Հայաստանը՝ զբոսաշրջային հաղորդակցության կենտրոն. Երևանում մեկնարկել է Համաշխարհային զբոսաշրջային հաղորդակցության ֆորումը

Երևանում մեկնարկել է  Համաշխարհային զբոսաշրջային հաղորդակցության ֆորումը (World Tourism Communication Forum: 

«Արմենպրես»-ի  հաղորդմամբ՝  երկու օր շարունակ  «Tourism Talks: Connecting People, Places, and Perspectives» խորագրով միջազգային հարթակը  հյուրընկալել և միավորել է ոլորտի համաշխարհային առաջնորդներին, քաղաքականություն մշակողներին և հաղորդակցության մասնագետներին՝ ուսումնասիրելու, թե ինչպես է ռազմավարական հաղորդակցությունը ձևավորում զբոսաշրջության ապագան։  

էկոնոմիկայի նախարար Գևորգ Պապոյանը նշեց՝ այսօր հավաքվել են՝ միասին քննարկելու, մտածելու, թե ինչպե՞ս կարելի է հաղորդակցության և մարդկային կապերի միջոցով ձևավորել զբոսաշրջային ապագան։  

«Ձեր ներկայությունն այստեղ խոսում է առաջին հերթին Հայաստանի հանդեպ աճող հետաքրքրության, վստահության և գործընկերային պատրաստակամության մասին։ Դա միաժամանակ և՛ գնահատանք է, և՛ պարտավորություն՝ շարունակել կառուցել ավելի հասանելի, ավելի հյուրընկալ և ավելի կայուն միջավայր մեր երկրի այցելուների համար։ Այսօր հաղորդակցությունը պարզապես տեղեկատվության փոխանակում չէ, այն ավելին է, և զբոսաշրջային հաղորդակցությունն ու բրենդավորումը, ըստ էության, ձևավորում են այն պատկերը, որով աշխարհը տեսնում և ընկալում է յուրաքանչյուր երկիր՝ որպես առանձնահատուկ զբոսաշրջային ուղղություն։ Այս գործընթացում, իհարկե, մեդիան ունի հզոր ազդեցություն և կարող է փոխել ցանկացած երկրի վերաբերյալ կարծրատիպերը, ցույց տալ իրական արժեքները և բացել նոր հնարավորություններ։ Արդյունքում զբոսաշրջիկն ուղղակի ընտրում է այն պատմությունը, որի մի մասը ինքն ուզում է դառնալ»,- նշեց նախարարը: 

Պապոյանն ընդգծեց՝ Հայաստանն իր հազարամյա մշակութային ժառանգությամբ, անկրկնելի բնությամբ և անկեղծ հյուրընկալությամբ անթիվ ու բազմազան պատմություններ ունի ներկայացնելու  հյուրերին. «Մեր նպատակն է դրանք պատմել աշխարհին ժամանակակից հաղորդակցական գործիքներով, թվային հարթակներով և, իհարկե, բազմակողմ համագործակցությամբ։ Զբոսաշրջությունը մեր տնտեսության ռազմավարական ուղղություններից մեկն է։ Այն ոչ միայն խթանում է տնտեսական աճը, այլ նաև նպաստում է ներառական զարգացմանը, նոր աշխատատեղերի ստեղծմանը, ենթակառուցվածքների բարելավմանը և, իհարկե, մեր մշակութային և պատմական ժառանգության պահպանմանը։ Մենք հավատում ենք, որ արդյունավետ հաղորդակցությունը, ճիշտ բրենդավորումը, մեդիայի ուժն ու միջմշակութային կապերը  միասին ձևավորում են կայուն զբոսաշրջային ապագա»,- ասաց Պապոյանը:

Նախարարը  հույս հայտնեց,  որ այս ֆորումը կդառնա արդյունավետ հարթակ գիտելիքի, փորձի և գաղափարների փոխանակման, ինչպես նաև համատեղ նախաձեռնությունների մեկնարկի համար։

Զբոսաշրջության կոմիտեի նախագահ Լուսինե Գևորգյանն էլ նշեց՝ այս ֆորումի միջոցով Հայաստանը նպատակ ունի ընդգծել հաղորդակցության առանցքային դերը՝ վստահության, ներգրավվածության և կայուն զբոսաշրջային զարգացման խթանման գործում: 

«Զբոսաշրջության համաշխարհային հաղորդակցության ֆորումը նպատակ ունի Հայաստանը դիրքավորել որպես տարածաշրջանում հաղորդակցության և խաղաղության խաչմերուկի նախաձեռնող։ Մենք հրավիրել ենք միջազգային հյուրերի, զբոսաշրջության, քաղաքական և տարբեր ոլորտների մասնագետների՝ քննարկելու այն հիմնական հարցերը, որոնք ֆորումի ընթացքում կդառնան աշխատաժողովի օրակարգի մաս։ Այս հարցերը կդրվեն սեղանին՝ նպատակ ունենալով գտնել գործնական լուծումներ: Մենք բոլոր պանելային քննարկումներում կարմիր թելի պես տանում ենք այն թեմաները, որոնք առնչվում են տարածաշրջանային համագործակցությանը, խաղաղությանը և հաղորդակցությանը»,- ասաց  Զբոսաշրջության կոմիտեի նախագահը: 

Գևորգյանն  ուրախությամբ նշեց,  որ ֆորումին մասնակցում են բարձր մակարդակի հյուրեր Հունաստանից, Իրանից, Սևծովյան տնտեսական համագործակցության կազմակերպությունից, ՄԱԿ-ի և ՄԱԿ-ի զբոսաշրջության համաշխարհային կազմակերպության (UN Tourism) ներկայացուցիչներ, ինչպես նաև գործընկերներ Վրաստանից։ Ըստ նրա՝ սա վկայում է, որ Հայաստանը իր ուրույն տեղն է զբաղեցնում համաշխարհային զբոսաշրջային քարտեզի վրա: 

Հայաստանում Եվրամիության առաքելության ղեկավար Վասիլիս Մարագոսը նշեց, որ ֆորումը Հայաստանում անցկացնելը շատ խորհրդանշական է, քանի որ այն համարվում է տարածաշրջանի «չբացահայտված գանձերից մեկը»։ 

Դեսպանն ընդգծեց, որ զբոսաշրջությունը Եվրոպական միությունում համարվում է տնտեսական զարգացման առանցքային ուղղություն՝ ապահովելով ԵՄ աշխատատեղերի շուրջ 10 տոկոսը և հսկայական հավելյալ արժեք։ Ըստ նրա՝ զբոսաշրջությունը ոչ միայն տնտեսության, այլև սոցիալական զարգացման շարժիչ ուժն է, որը կապում է մարդկանց և մշակույթները:    

Հայաստանում Եվրամիության առաքելության ղեկավարը նշեց, որ ոլորտը միաժամանակ բախվում է մարտահրավերների՝ սեզոնայնությունից մինչև կլիմայական փոփոխություններ և աշխարհաքաղաքական անկայունություն։ Նրա խոսքով՝ ԵՄ-ում այս պահին մշակվում է առաջին համաեվրոպական զբոսաշրջային ռազմավարությունը, որի մշակման գործընթացում Հայաստանը նույնպես ունի իր ներդրումը։ 

«Հայաստանն ունի զբոսաշրջային մեծ ներուժ, և մենք բարձր ենք գնահատում Հայաստանի զբոսաշրջային ռազմավարությունը 2026-2030 թվականների համար։ Եվ կարող եմ ասել, որ այդ ռազմավարությունն ընդհանուր առմամբ համապատասխանում է և լիովին համահունչ է ԵՄ-ի հետ նոր գործընկերային օրակարգին»,-ասաց Մարագոսը։ 

ԵՄ առաքելության ղեկավարը տեղեկացրեց, որ ԵՄ-ն աջակցում է Հայաստանի տարբեր նախաձեռնություններին՝ նորարարական զբոսաշրջության, կրթության և համայնքային զարգացման ուղղություններով։ Մարագոսի խոսքով՝ ԵՄ-ն վերջին տարիներին աջակցել է ավելի քան 80 տեղական նախաձեռնության, որի արդյունքում ստեղծվել է շուրջ 200 աշխատատեղ։

Նա որպես օրինակ նշեց Գյումրիում «Թումո»-ի հետ համատեղ իրականացվող խոհանոցի դպրոցի հիմնադրումը և Սյունիքում իրականացվող համայնքային ծրագրերը, որոնք միտված են տարածաշրջանի տնտեսական ակտիվացմանը։ 

Մարագոսը հավելեց, որ ԵՄ-ն կարևորում է նաև Հայաստանի և ԵՄ երկրների միջև մարդկանց կապերի խորացումը, այդ թվում՝ վիզային դյուրացումների գործընթացի միջոցով։ «Մեր նպատակը փոխադարձ շփումների ընդլայնումն է, որպեսզի ավելի շատ եվրոպացիներ այցելեն Հայաստան, և ավելի շատ հայեր այցելեն Եվրոպա»,- ասաց նա։