Ճապոնիայի վարչապետն անհանգստացած է Չինաստանի, Ռուսաստանի և ԿԺԴՀ-ի քաղաքականությունից

Սանաե Տակաիչին Ճապոնիայի վարչապետի պաշտոնում խորհրդարանում ունեցած իր առաջին ծրագրային ելույթում հայտարարել է երկրի պաշտպանությունն ամրապնդելու և ազգային անվտանգության ռազմավարությունը փոխելու անհրաժեշտության մասին, մտահոգություն է հայտնել տարածաշրջանում Չինաստանի, Ռուսաստանի և ԿԺԴՀ-ի քաղաքականության առնչությամբ: «Արմենպրես»-ի փոխանցմամբ՝ այս մասին հաղորդում է The Associated Press գործակալությունը:

«Բաց, ազատ և կայուն միջազգային կարգը, որին մենք ընտելացել ենք, ուժեղ ցնցումների է ենթարկվել ուժերի հավասարակշռության պատմական փոփոխության և աշխարհաքաղաքական մրցակցության սրման պատճառով։ Ճապոնիայի շուրջ տարածաշրջանում մեր հարևանների՝ Չինաստանի, Հյուսիսային Կորեայի և Ռուսաստանի ռազմական ակտիվությունը և մյուս գործողությունները լուրջ մտահոգություն են առաջացնում», - ասել է նա։

Նրա խոսքով՝ Ճապոնիան պետք է ակտիվորեն առաջ մղի պաշտպանական հզորության ամրապնդումը։ 

Սանաե Տակաիչին նշել է, որ նոր ռազմավարությունն ազգային անվտանգության ոլորտում պետք է պատրաստ լինի մինչև 2026 թ. վերջը։ Վարչապետը շարունակել է, որ իր կառավարությունը մտադիր է ամենամյա պաշտպանության ծախսերն ավելացնել մինչև ՀՆԱ-ի 2%-ին 2026 թ. մարտին, այլ ոչ թե 2027 թվականին, ինչպես պլանավորվել էր սկզբում: 

Վարչապետի հայտարարությունները հնչել են հաջորդ շաբաթ ԱՄՆ նախագահ Դոնալդ Թրամփի այցին ընդառաջ, որը կարող է Տոկիոյից պահանջել զգալիորեն ավելացնել պաշտպանության ծախսերը։ Տակաիչին ասել է, որ ցանկանում է Թրամփի հետ քննարկել Ճապոնիա-ԱՄՆ դաշինքի ուժեղացումը։

Ճապոնիան ներկայում իրականացնում է պաշտպանության զարգացման հնգամյա ծրագիրը։ Ավելի վաղ Ճապոնիան ռազմական ոլորտում տարեկան ծախսել է ՀՆԱ-ի շուրջ 1%-ը։ Սակայն 2022 թվականից ի վեր Տոկիոն սկսել է պաշտպանության ոլորտում ներդրումներն ավելացնել, որպեսզի հասցնի ՀՆԱ-ի 2%-ի։ Այս պլանի կատարման դեպքում տարեկան պաշտպանական ծախսերը կհասնեն 73 միլիարդ դոլարի։