2 րոպեի ընթերցում
ԵԱՀԿ-ն ողջունում է Հայաստանի և Ադրբեջանի կողմից Մինսկի խումբը լուծարելու գործընթացը:
«Արմենպրես»-ի փոխանցմամբ՝ այս մասին Հայաստանի արտաքին գործերի նախարար Արարատ Միրզոյանի հետ համատեղ ասուլիսի ընթացքում հայտնեց ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենը:
«Մենք պարբերաբար նկատել ենք Հայաստանի աջակցությունը խաղաղության օրակարգին՝ անկախ բոլոր մարտահրավերներից: Ինչպես նաև այդ համատեղ դիմումն եմ ես ողջունում՝ ԵԱՀԿ Մինսկի խումբը լուծարելու։ Հուսանք, որ դա տեղի կունենա դեկտեմբերից ոչ ուշ»,-ասաց Վալտոնենը:
ԵԱՀԿ գործող նախագահը նշեց, որ խաղաղությունը պետք է լինի կայուն, և պատրաստ են աջակցել այդ գործընթացին:
Հայաստանն ու Ադրբեջանը Վաշինգտոնում օգոստոսի 8-ին ԵԱՀԿ-ին ուղղված համատեղ դիմում էին ստորագրել՝ ԵԱՀԿ Մինսկի խումբը լուծարելու հարցով։ ԵԱՀԿ-ն սեպտեմբերի 1-ին Մինսկի խումբը լուծարելու որոշում էր ընդունել։ ԵԱՀԿ-ում Ռուսաստանի ներկայացուցիչ Ալեքսանդր Լուկաշևիչը հայտարարել էր, որ Մինսկի խմբի վերջնական լուծարումը նախատեսված է 2025 թվականի դեկտեմբերին։ Նա մանրամասնել էր, որ խոսքը վերաբերում է երեք ինստիտուտի՝ Մինսկի խմբի, ԵԱՀԿ գործող նախագահի անձնական ներկայացուցչի պաշտոնի և բարձր մակարդակի պլանավորման խմբի աշխատանքի դադարեցմանը: