Լողի անվճար ուսուցում. մեկնարկում է հայտագրման գործընթացն Արագածոտնի, Կոտայքի և Տավուշի մարզերի երեխաների համար

ՀՀ մարզերում դպրոցահասակ երեխաների առողջ ապրելակերպի խրախուսման և լողի անվճար ուսուցման փորձնական ծրագրի շրջանակում մեկնարկել է Արագածոտնի, Կոտայքի և Տավուշի մարզերի երեխաների գրանցման գործընթացը:

«Արմնպրես»-ի փոխանցմամբ՝ կրթության, գիտության, մշակույթի և սպորտի նախարարությունից հայտնում են, որ ծրագիրը նախատեսված է երկու տարիքային խմբերի համար.

• 8–12 տարեկաններ
• 13–17 տարեկաններ

Լողավազաններում դպրոցահասակ երեխաների համար լողի ուսուցումը նախատեսվում է իրականացնել 2 տարիքային խմբերի համար՝ 3-ական խմբով. 1-ին խմբում ընդգրկվում են 8-12 տարեկան երեխաներ, 2-րդ խմբում՝ 13-17 տարեկաններ: Ընդհանուր առմամբ` յուրաքանչյուր մարզում լողի պարապմունքների ծրագրում կընդգրկվի 66 երեխա՝ տարիքային 2 խմբում: Ծրագրին մասնակցելու համար անհրաժեշտ է գրանցվել emis.am կայքի  «Սովորողի օրագիր» էջում բացված համապատասխան բաժնում։

Գրանցումն իրականացվում է երեխայի ծնողի կամ օրինական ներկայացուցչի կողմից։ 

Գրանցման վերջնաժամկետը 2025 թվականի հոկտեմբերի 15-ն է:

Լողի պարապմունքներին երեխաների մասնակցությունն անվճար է։ Ուսուցումը կիրականացվի Ապարան, Իջևան և Հրազդան համայնքներում գործող լողավազաններում՝ փորձառու մասնագետների ուսուցմամբ և անվտանգային համապատասխան պայմանների ապահովմամբ։