368.52
Կրեմլը հերքել է Պեկինից արբանյակային տվյալների ստացումը Ուկրաինային հարվածներ հասցնելու համար
1 րոպեի ընթերցում
Ռուսաստանն իր սեփական հնարավորություններն ունի Ուկրաինայում մարտական գործողությունների ժամանակ հետախուզական տվյալներ ստանալու համար, հայտարարել է Ռուսաստանի նախագահի մամուլի քարտուղար Դմիտրի Պեսկովը։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը։
«Մենք ունենք մեր սեփական հնարավորությունները, այդ թվում՝ տիեզերական հնարավորությունները՝ կատարելու հատուկ ռազմական գործողության առջև ծառացած բոլոր խնդիրները», - ասել է Կրեմլի խոսնակը:
Պեսկովը նման հայտարարություն է արել՝ մեկնաբանելով ուկրաինական կողմի այն պնդումները, թե Չինաստանը Ռուսաստանին տրամադրում է արբանյակային հետախուզական տվյալներ՝ Ուկրաինայի տարածքում հրթիռային հարվածների համար։
Հոկտեմբերի 4-ին Ուկրաինայի արտաքին հետախուզության ծառայության աշխատակից Օլեգ Ալեքսանդրովն «Ուկրինֆորմ» գործակալությանը հայտնել էր, որ Կիևն ունի «Ռուսաստանի և Չինաստանի միջև բարձր մակարդակի համագործակցության փաստեր» առ այն, որ անցկացվում է Ուկրաինայի տարածքի արբանյակային հետախուզություն՝ ռազմավարական թիրախների խոցման նպատակով:
Բաժանորդագրվեք մեր ալիքին Telegram-ում