Եվրոպայի խորհրդին անդամակցությունն ավելի մեծ վստահություն է տալիս ժողովրդավարական բարեփոխումներ իրականացնելիս. ՀՀ վարչապետ
2 րոպեի ընթերցում
Հայաստանի Հանրապետության վարչապետ Նիկոլ Փաշինյանը շնորհակալություն հայտնեց Եվրոպայի խորհրդին՝ Հայաստանի անդամակցության պահից Հայաստանին ցուցաբերած աջակցության համար։
«Արմենպրես»-ի փոխանցմամբ՝ այս մասին Փաշինյանը նշեց ԵԽԽՎ աշնանային նստաշրջանում իր ելույթում։
«Մեր անդամակցությունը ԵԽ-ին մեզ ավելի մեծ վստահություն է տալիս՝ ժողովրդավարական բարեփոխումներ իրականացնելիս, որովհետև գիտենք, եթե սխալվենք, կա մեզ հարազատ կազմակերպություն, որը մեզ կահազանգի այդ մասին, կօգնի մեզ գտնել ճիշտ ուղղությունը՝ ժողովրդավարության, ցավոք, գնալով ավելի դժվար դարձող ճանապարհին։ ԵԽ-ն մեր տունն է, որտեղ մենք հասցե ենք ստանում՝ որպես ժողովրդավարական պետություն։ Լինելով փոքր երկիր՝ մենք այստեղ մի մեծ, գեղեցիկ և լուսավոր ընտանիքի մի մասն ենք դառնում, որտեղ մարդն ամենակարևոր արժեքն է, որտեղ մարդը նպատակ է, ոչ թե միջոց։ Այս ընտանիքը կարևոր է մեզ համար»,-ասաց վարչապետը։
Նիկոլ Փաշինյանն ընդգծեց՝ Հայաստանում մեծ կարևորություն են տալիս Եվրոպայի խորհրդին, Մարդու իրավունքների եվրոպական դատարանին, Վենետիկի հանձնաժողովին, Եվրոպայի խորհրդի խորհրդարանական վեհաժողովին։
Իր ելույթում վարչապետը նշեց՝ հայ ժողովուրդը ԵԽ-ն և ԵԽԽՎ-ն ընդունում և ընկալում է, որպես ժողովրդավարության և մարդու իրավունքների պահապան և պաշտպան։