Հնդկաստանի դեսպանատան նախաձեռնությամբ Երևանում կայացավ «Viksit Bharat Run 2025» վազքի մրցաշարը
2 րոպեի ընթերցում
Հայաստանում Հնդկաստանի դեսպանատան նախաձեռնությամբ կազմակերպված 5 կմ վազքի մրցաշարին մասնակցեցին մոտ 100 վազորդներ;
«Արմենպրես»-ի հաղորդմամբ` Հնդկաստանի կառավարության սպորտի և երիտասարդության հարցերի նախարարության կողմից անցկացվող «Viksit Bharat Run 2025» վազքի մրցաշարը տեղի է ունենում աշխարհի շուրջ 150 քաղաքներում, այդ թվում նաև Հայաստանի Հանրապետության մայրաքաղաք Երևանում:
5 կմ վազքին այս անգամ մասնակցում էին Հնդկաստանի սփյուռքի, տեղական համայնքի ներկայացուցիչները, ուսանողներ, մարզասերներ, մասնագետներ:
«Մենք մասն ենք կազմում գլոբալ նախաձեռնության, որը կազմակերպել է Հնդկաստանի կառավարությունը` աշխարհի 150 երկրներում անցկացնելով վազքի նմանատիպ մրցաշարեր: Նպատակ ունեինք համախմբել հնդիկ ու հայ երիտասարդներին: Մենք իսկապես երջանիկ ենք, որ Երևանն ու մենք մաս կազմեցինք գլոբալ այս շարժմանը»,- ասաց ՀՀ-ում Հնդկաստանի դեսպան Նիլակշի Սահա Սինհան:
Վազքի մրցաշարին ներկա էր նաև ՀՀ կրթության, գիտության, մշակույթի և սպորտի նախարար տեղակալ Հասմիկ Ավագյանն, ով ողջունեց ներկաներին ու հաջողություն մաղթեց մասնակիցներին:
«Այս նախաձեռնությունը կխորացնի հայ-հնդկական փոխհարաբերությունը և այս անգամ սպորտի միջոցով»,- նշեց Ավագյանը:
Տղամարդկանց մրցավազքում առաջինը 5 կմ տարածությունը հաղթահարեց Վանյա Սարգսյանը, երկրորդը Արամ Խաչատրյանն էր, իսկ եռյակի վերջում Գևորգ Թորոսյանն էր:
Կանանց մրցմանը եզրագիծն առաջինը հատեց Նատալյա Պոմելովան, երկրորդ և երրորդ տեղերը հաջորդաբար զբաղեցրեցին Ռակշիտա Պանդեյն ու Ռեյչլ Ալես Վիսուզան: