360.51
Աշխարհի առաջնության բրոնզե մեդալակիր Գևորգ Թադևոսյանը ըմբշամարտի ԱԱ-ի բրոնզե մեդալը սպասված արդյունք է համարում
1 րոպեի ընթերցում
Հայաստանի հունահռոմեական ոճի ըմբշամարտի հավաքականի անդամ, աշխարհի առաջնության բրոնզե մեդալակիր Գևորգ Թադևոսյանը Ղազախստանի մայրաքաղաք Աստանայում կայացած աշխարհի առաջնության մեդալը թիմային աշխատանքի արդյունք է համարում:
«Ինձ համար այս բրոնզե մեդալը շատ սպասված մեդալ էր: Թեպետ նպատակն աշխարհի առաջնությունում հաղթելն էր, ցավոք, այս անգամ չհաջողվեց: Բավարարվեցի բրոնզե մեդալով, քանի որ սխալներ ունեի գոտեմարտերի ժամանակ»,-«Արմենպրես»-ի հաղորդմամբ` «Զվարթնոց» օդանավակայանում լրագրողների հետ զրույցում ասաց Գևորգ Թադևոսյանը:
Վերջինիս խոսքով` ինքը պատրաստ էր թե կիսաեզրափակիչ ու թե բրոնզե մեդալի համար գոտեմարտին: «Անհատական մեդալների թիկունքին միշտ էլ թիմային աշխատանքի արդյունքն է: Ես շնորհակալ եմ ընկերներիս, մարզիչներիս ու յուրաքանչյուրին, ով օգնել է ինձ այս ճանապարհին»,-ասաց նա:
Հունահռոմեական ոճի ըմբշամարտի աշխարհի առաջնությունում Հայաստանը նվաճեց երկու մեդալ: 87 կգ քաշային կարգում ԱԱ-ի բրոնզե մեդալակիր դարձավ Գևորգ Թադևոսյանը, իսկ 63 կգ քաշում աշխարհի չեմպիոն դարձավ Կարեն Ասլանյանը:
Բաժանորդագրվեք մեր ալիքին Telegram-ում