Երևան-Արմավիր ավտոճանապարհին «Մերսեդես»-ի և «Գազել»-ի բախման հետևանքով 10 անձ հոսպիտալացվել է
1 րոպեի ընթերցում
Երևան-Արմավիր ավտոճանապարհից դեպի Ակնալիճ հատվածում բախվել են «Մերսեդես» և «Գազել» մակնիշի մեքենաները, ինչի հետևանքով «Գազել»-ը կողաշրջվել է: «Արմենպրես»-ի թղթակցի հետ զրույցում այս մասին հայտնեցին ՀՀ ՆԳՆ ոստիկանությունից, հստակեցնելով, որ վթարի մասին ահազանգը ստացվել է սեպտեմբերի 26-ին ժամը 06:52-ին:
«10 անձ տարբեր աստիճանի մարմնական վնասվածքներով դիմել է բուժօգնության: Կազմված փաստաթղթերն արդեն փոխանցվել է Քննչական կոմիտե»,- տեղեկացրեցին Ոստիկանությունից:
Առողջապահության նախարարության մամուլի քարտուղար Մարիամ Ծատրյանն էլ տեղեկացրեց, որ հոսպիտալացված 10 բուժառուներից 7-ի առողջական վիճակը բավարար է, 3-ինը՝ միջին ծանրության:
«Բուժառուները տեղափոխվել են մարզի բժշկական կենտրոն: Միջին ծանրության հիվանդներն այս պահին հետազոտություններ են անցնում, անհրաժեշտ բուժօգնություն ստանում: Ծանր դեպքեր, կյանքին սպառնացող վտանգ չունենք»,- մանրամասնեց մեր զրուցակիցը: