ՉԺՀ հիմնադրման 76-ամյակի առթիվ ՀՀ-ում Չինաստանի դեսպանատանը կազմակերպվեց հանդիսավոր ընդունելություն
4 րոպեի ընթերցում
ՀՀ-ում Չինաստանի արտակարգ և լիազոր դեսպան Լի Սինվեյը ընթացիկ տարին նշանակալի փուլ է համարում Հայաստան-Չինաստան հարաբերություններում։
«Արմենպրես»-ի հաղորդմամբ՝ Լի Սինվեյը նման համոզմունք հայտնեց Չինաստանի Ժողովրդական Հանրապետության հիմնադրման 76-ամյակի կապակցությամբ դեսպանատանը կազմակերպված հանդիսավոր ընդունելության ժամանակ:
«Վերջերս ՀՀ վարչապետ Նիկոլ Փաշինյանը հաջող այց ունեցավ Չինաստան, որտեղ հանդիպեց նախագահ Սի Ծինփինի հետ: Երկու կողմերը համատեղ հայտարարեցին ռազմավարական գործընկերության հաստատման մասին, ինչը նոր փուլ բացեց մեր երկկողմ հարաբերությունների զարգացման մեջ»,-ասաց Լի Սինվեյը:
Նրա խոսքով՝ այս տարվա առաջին կիսամյակում Հայաստանի և Չինաստանի միջև երկկողմ առևտրի ծավալը գերազանցել է 1,2 միլիարդ ԱՄՆ դոլարը, իսկ փոխադարձ այցելությունների թիվը կազմել է ավելի քան 30 հազար մարդ: Ներկայում շաբաթական երեք անգամ իրականացվում են Երևան-Ուրումչի ուղիղ թռիչքներ, ինչն, ըստ Լի Սինվեյի, նպաստում է երկու երկրների մշտապես սերտ կապի մեջ գտնվելուն:
«Հայացք գցելով դեպի ապագա, կարելի է տեսնել, որ մեր երկրների համագործակցության հեռանկարները լայն են և խոստումնալից»,-հավելեց դեսպանը՝ ընդգծելով, որ ինքնիշխանության, անկախության, տարածքային ամբողջականության և սահմանների անխախտելիության հարցերում Հայաստանը և Չինաստանը միշտ դրսևորել են փոխըմբռնում ու փոխադարձ աջակցություն:
ՀՀ փոխվարչապետ Տիգրան Խաչատրյանը, շնորհավորելով ՉԺՀ-ի հիմնադրման տարեդարձի կապակցությամբ, գոհունակությամբ արձանագրեց, որ 1992 թվականին դիվանագիտական հարաբերությունների հաստատումից ի վեր Հայաստանի և Չինաստանի միջև ձևավորված փոխգործակցությունը շարունակում է զարգանալ՝ դրսևորելով նկատելի աճի միտումներ, արձանագրելով շոշափելի արդյունքներ:
«Մեր երկրների միջև քաղաքական երկխոսության բարձր մակարդակն իր արտացոլումն է գտնում նաև միմյանց համար կարևորություն ներկայացնող հարցերի վերաբերյալ կողմերի դիրքորոշումներում: Հայաստանը բազմիցս իրաջակցությունն է հայտնել «Մեկ Չինաստան» սկզբունքին, և ուրախ ենք փաստել, որ Չինաստանն աջակցում է Հայաստանի քաղաքական անկախությանը, ինքնիշխանությանը, տարաքծային ամբողջականությանը և ողջունել է Հայաստանի ու Ադրբեջանի միջև խաղաղության գործընթացը»,- նշեց Խաչատրյանը՝ հավելելով, որ Հայաստանը ձգտում է ամրապնդել համագործակցությունը Շանհայի համագործակցության կազմակերպության հետ՝ սատարելով ՇՀԿ-ի հիմնարար սկզբունքներին՝ ինքնիշխանության, անկախության և տարածքային ամբողջականության նկատմամբ փոխադարձ հարգանքի, պետական սահմանները չխախտելու, ագրեսիայի փոխադարձ բացառման, ներքին գործերին չմիջամտելու, ինչպես նաև միջազգային հարաբերություններում ուժ կամ դրա սպառնալիք չկիրառելու վերաբերյալ:
Միջոցառմանը ներկա էին նաև ՀՀ փոխարտգործնախարար Վահան Կոստանյանը, պաշտոնատար այլ անձինք, քաղաքական ու հասարակական գործիչներ, Հայաստանում տարբեր երկրների դեսպաններ:
Երեկոն ամփոփվեց մշակութային ծրագրով: