Հայաստան

Վարչապետը պարզաբանել է, թե ինչու Հայաստանը չի միացել Դուբլինի հռչակագրին

2 րոպեի ընթերցում

Վարչապետը պարզաբանել է, թե ինչու Հայաստանը չի միացել  Դուբլինի հռչակագրին

ՀՀ վարչապետ Նիկոլ Փաշինյանը հայտարարել է, որ Հայաստանը Դուբլինում ընդունված՝ եվրոպական անվտանգության հիմնարար սկզբունքների մասին հռչակագրին չի միացել ՆԱՏՕ-ին վերաբերող ծավալուն հղումների պատճառով։ Նրա խոսքով՝ Հայաստանը սկսել է Եվրամիությանն անդամակցության գործընթաց, սակայն ՆԱՏՕ-ին անդամակցելու նպատակ չի դրել։

«Արմենպրես»-ի փոխանցմամբ՝ վարչապետը նոյեմբերի 18-ին՝ կառավարության հետ հարցուպատասխանի ընթացքում պատասխանել է պատգամավոր Վոլոդյա Հակոբյանի հարցին։

Հակոբյանը հետաքրքրվել է, թե ինչու Հայաստանը չի միացել նոյեմբերի 12-ին Եվրոպական քաղաքական համայնքի գագաթնաժողովի շրջանակում Ֆրանսիայի նախաձեռնությամբ ընդունված փաստաթղթին։ 

Փաշինյանն ասել է, որ որոշման պատճառը բաց ներկայացրել է գործընկերներին։

«Մենք չենք միացել մի պատճառով․ ես թափանցիկ գործընկերներին ասել եմ՝ այնտեղ շատ մեծ ծավալով հղումներ կային ՆԱՏՕ-ին։ Մենք մեր դիրքորոշումն արտահայտել ենք, որ, այո՛, Եվրամիությանն անդամագրվելու գործընթաց ենք մեկնարկել, բայց մեր քաղաքականությունների մեջ չունենք որոշում, որ մենք ՆԱՏՕ-ին անդամագրվելու ենք կամ ընդհանրապես նման խնդիր ենք դրել»,- հայտարարել է վարչապետը։

Նա հավելել է, որ փաստաթղթի մյուս հատվածներում ընդունելի և ծանրակշիռ բովանդակություն է եղել։

Փաշինյանի խոսքով՝ Եվրամիությանն անդամակցելու և ռազմաքաղաքական դաշինքի մաս դառնալու հարցերը կառավարությունը տարբերակում է։

«Մենք ասել ենք՝ Եվրամիություն՝ այո՛, բայց ռազմաքաղաքական դաշինքի տրամաբանությամբ քաղաքականություն չենք որդեգրում։ Դա է եղել պատճառը, և ըմբռնումով են վերաբերվել»,- ասել է վարչապետը։

 

AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2026 ARMENPRESS

Ստեղծվել է՝ MATEMAT-ում