Կստեղծվի Տեղեկատվական համակարգերի կարգավորման մարմին. ներկայացվել է Կիբեռանվտանգության մասին նոր օրենք
4 րոպեի ընթերցում
Ազգային ժողովի պետաիրական հարցերի մշտական հանձնաժողովը հավանություն տվեց Կիբեռանվտանգության մասին և կից ներկայացված օրենքների նախագծերի փաթեթին, որի նպատակն է բարձրացնել Հայաստանի կիբեռպաշտպանական կարողությունները:
«Արմենպրես»-ի փոխանցմամբ՝ նախագծերի փաթեթը հանձնաժողովի նիստում ներկայացրեց Բարձր տեխնոլոգիական արդյունաբերության նախարար Մխիթար Հայրապետյանը:
«Այսօր կիբեռխոցելիության առումով Հայաստանի դիրքերը լավատեսություն չեն ներշնչում: Սա վերաբերում է թե՛ հանրային, թե՛ մասնավոր հատվածին: Սա նշանակում է, որ կարևորագույն ենթակառուցվածքների համար կիբեռհարձակումների ամենօրյա ռիսկ է առկա»,-ասաց Հայրապետյանը:
Նրա խոսքով՝ կարգավորման հիմնական նպատակն է ստեղծել կիբեռանվտանգ միջավայր, որտեղ կապահովվի կիբեռհիգիենայի բարձր մակարդակ թե՛ պետական կառույցներում, և թե՛ կրիտիկական ենթակառուցվածքներ շահագործող մասնավոր հատվածում:
«Հիմնական նպատակն է բարձրացնել մեր կիբեռպաշտպանական կարողությունները և մեր իմունիտետը՝ դիմագրավելու այն կիբեռսպառնալիքներին, որոնց առերեսվում ենք այսօր: Առաջարկում ենք ստեղծել նոր ինքնավար մարմին՝ Տեղեկատվական համակարգերի կարգավորման մարմին, որտեղ պետք է գեներացվեն փորձագիտական, մասնագիտական բարձր կարողունակություններ, գիտելիքներ, հմտություններ: Ըստ էության, այս մարմինը ստանձնելու է պետական կառավարման համակարգի՝ քաղաքացիական մասով կիբեռպաշտպանության գործառույթները, մյուս կողմից իմպլեմենտացնելու է Բարձր տեխնոլոգիական արդյունաբերության նախարարության սահմանած քաղաքականությունը: Մյուս կողմից այն աջակցող, ստանդարտներ սահմանող, վերահսկող, անհրաժեշտության դեպքում մասնավոր հատվածի հետ կիբեռհետևանքները վերացնող ֆունկցիա է ունենալու հենց մասնավոր հատվածի համար»,–ասաց նախարարը:
Նա ընդգծեց՝ այս օրենքով առաջին հերթին ազգային կարողունակություններն են մեծացնում՝ պաշտպանելու հանրային հատվածը, պետական կառավարման հատվածը, մյուս կողմից խաղի նոր կանոններ են սահմանում ամբողջ տնտեսության, պետական հատվածի համար, որոնք հետայսու ռիսկերի և ազդեցությունների գնահատման չափորոշիչներին պետք է հետևեն, ինչպես նաև՝ պետության կողմից սահմանվող նոր ստանդարտներին:
Այս նոր մարմինը նաև ենթաօրենսդրական ակտերով պետք է չափորոշիչներ սահմանի կիբեռանվտանգային ծառայություններ մատուցող ընկերությունների համար՝ նրանց որակավորելով, ինչպես նաև որակավորելով համապատասխան մասնագետներին:
«Սահմանվում է, որ թե՛ հանրային հատվածի համար, թե մասնավոր հատվածում կիբեռպաշտպանության համար պետք է ներդրվեն կիբեռանվտանգության գործառնությունների կենտրոններ: Մասնավոր հատվածին հնարավորություն ենք տալիս կամ ներքին կառուցվածքում նախատեսել համապատասխան ստորաբաժանում՝ որակավորված մասնագետներով, կամ ցանկության դեպքում մասնավոր հատվածը սա կարող է պատվիրակել կիբեռանվտանգային ծառայություններ մատուցող ընկերություններին»,-ասաց Հայրապետյանը:
Իսկ թե կիբեռանվտանգության գործառնությունների կենտրոնը կոնկրետ ինչ գործառույթ է կատարելու հանրային և մասնավոր հատվածների համար, նախարարն ասաց, որ պետք է էլեկտրոնային համակարգերի, ամբողջ օպերացիոն համակարգերի մշտական՝ 24/7 ռեժիմով մոնիթորինգ իրականացնի, արձանագրի, բացահայտի կիբեռմիջադեպերը և այլն: