Միջին մասնագիտական կրթական ծրագրերի գերակա մասնագիտություններով ընդունվողների թիվը գրեթե կրկնապատկվել է
2 րոպեի ընթերցում
Ընթացիկ տարում միջին մասնագիտական կրթական ծրագրերի գերակա համարվող 15 մասնագիտություններով միայն առաջին փուլի արդյունքում արդեն իսկ համապատասխան ուսումնական հաստատություններ է ընդունվել 825 դիմորդ՝ անցած տարվա ընդհանուր երկու փուլերի 717-ի փոխարեն։
«Արմենպրես»-ի հաղորդմամբ՝ այս մասին օգոստոսի 27-ի մամուլի ասուլիսում տեղեկացրեց ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ նշելով, որ կառավարության քաղաքականությունը, որն ուղղված էր գերակա որոշ ուղղություններով ավելի բարձր չափով կրթաթոշակի տրամադրմանն ու դրանով իսկ դիմելիության խրախուսմանը, արդեն իսկ լավ արդյունքներ է արձանագրել։
«Պետք է ասեմ, որ առաջին տարում, երբ այս մոտեցումը ներդրվեց, 445 դիմորդ էինք ունեցել։ Այսինքն՝ կարող ենք ասել, որ դիմորդների թիվը գրեթե կրկնապատկվում է, և սա այն դեպքում, երբ լրացուցիչ փուլը դեռևս ամփոփված չէ։ Սա նշանակում է, որ, օրինակ, միջին մասնագիտական կրթական ծրագրերով պետության քաղաքականությունն այս ուղղություններով կրթաթոշակի տրամադրմամբ իսկապես ունեցել է արձագանք, և դիմորդները դիմում ու սովորում են այս ուղղություններով»,-ներկայացրեց Անդրեասյանը՝ հավելելով, որ ուսանողները ընդունվելուց հետո պետք է պատշաճ առաջադիմություն ունենան, որպեսզի առաջին տարվանից հետո շարունակեն կրթաթոշակ ստանալ։