«Խաղաղության խաչմերուկ» նախագիծը Միացյալ նահանգների կողմից ամենաբարձր ճանաչմանն է արժանանում. Խանդանյան
3 րոպեի ընթերցում
ՀՀ-ի և ԱՄՆ-ի միջև օգոստոսի 8-ի հանդիպման շրջանակներում ստորագրվել են կարևոր փաստաթղթեր, որոնք բխում են ռազմավարական գործընկերության փաստաթղթից:
«Արմենպրես»-ի հաղորդմամբ՝ այս մասին Հանրային հեռուստատեսությանը տված հարցազրույցում հայտնել է ՀՀ Ազգային ժողովի Արտաքին հարաբերությունների մշտական հանձնաժողովի նախագահ Սարգիս Խանդանյանը:
Նրա խոսքով՝ ստորագրված այդ փաստաթղթերից առաջինը և առանցքայինը վերաբերում է «Խաղաղության խաչմերուկ» նախագծին:
«Դա նշանակում է, որ Միացյալ Նահանգներն իր աջակցությունն է հայտնում ՀՀ կառավարության «Խաղաղության խաչմերուկ» նախագծին և ենթադրում է, որ Միացյալ Նահանգները Հայաստանի հետ համագործակցելու է այս ենթակառուցվածքային ծրագիրը կյանքի կոչելու և ներդրումներ կատարելու գործում: Մասնավորապես՝ կարող եմ առանձնացնել օրինակ՝ Հայաստանի մաքսային ծառայության և սահմանապահ զորքերի կարողությունները, այդ թվում՝ տեխնիկական, զարգացնելու գործում: Այդ փաստաթղթում Միացյալ Նահանգներն իր անվերապահ աջակցությունն է հայտնում Հայաստանի տարածքային ամբողջականությանը, ինքնիշխանությանը և սահմանների անխախտելիությանը, և այս աջակցությունը հենց այս սկզբունքների շրջանակում է գործելու: Նաև պետք է արձանագրել, որ այս փաստաթղթով, ըստ էության, «Խաղաղության խաչմերուկ» նախագիծը Միացյալ նահանգների կողմից ամենաբարձր ճանաչմանն է արժանանում»,-նշել է Խանդանյանը:
Նախ հավելել է, որ ստորագրված երկրորդ կարևոր փաստաթուղթը վերաբերում է էներգետիկայի ոլորտին: Ըստ այդմ՝ Միացյալ Նահանգները համագործակցելու և աջակցելու է Հայաստանում էներգետիկ անվտանգության հարցում: Մասնավորապես՝ առանձնացվում է քաղաքացիական միջուկային էներգետիկայի զարգացումը և Միացյալ Նահանգները պատրաստակամություն է հայտնում ներդրումներ կատարել այս հարցում:
Բացի այդ՝ այն ներառում է նաև վերականգնվող էներգետիկան:
Խանդանյանի համոզմամբ՝ սա Հայաստանի էներգետիկ դիվերսիֆիկացիային նպաստող փաստաթուղթ է:
Երրորդ կարևոր փաստաթուղթը, որը ստորագրվել է Հայաստանի և ԱՄՆ-ի միջև, ըստ բանախոսի, վերաբերում է բարձր տեխնոլոգիաներին և արհեստական բանականությանը: «Այստեղ ևս Հայաստանը և Միացյալ Նահանգները համագործակցելու են՝ ներգրավելով նաև մասնավոր հատվածին՝ բարձր տեխնոլոգիաների և արհեստական բանականության ոլորտում Հայաստանի կարողությունները գնահատելու և ներդրումներ կատարելու հարցում»,-պարզաբանել է նա:
ՀՀ ԱԺ Արտաքին հարաբերությունների մշտական հանձնաժողովի նախագահն ընդգծել է, որ ստորագրված փաստաթղթերը մտադրությունների փոխըմբռնման հուշագրեր են, որոնց հիման վրա աշխատանքային խմբերը և երկրների կառավարությունները, ներգրավելով տարբեր շրջանակների, այդ թվում՝ մասնավոր, պետք է շարունակեն աշխատել:
«Բայց փաստը, որ այս փաստաթղթեը ստորագրում են երկրների առաջնորդները մեծ կշիռ է տալիս դրանց»,-ընդհանրացրեց Խանդանյանը: