2 րոպեի ընթերցում
ԱՄՆ նախագահ Դոնալդ Թրամփը պլանավորել է Սպիտակ տան համալիրում կառուցել պարահանդեսային սրահ, որը կկարողանա հյուընկալել մեծ թվով մարդկանց. այս նախաձեռնության համար կծախսվի 200 միլիոն դոլար: «Արմենպրես»-ի փոխանցմամբ՝ այդ մասին հաղորդագրություն է տարածել Սպիտակ տունը:
«Սպիտակ տունն աշխարհի ամենագեղեցիկ և պատմական շենքերից մեկն է, սակայն ներկայում Սպիտակ տունը չի կարող հյուրընկալել համաշխարհային առաջնորդների և այլ երկրների պատվին խոշոր միջոցառումներ՝ առանց շենքի գլխավոր մուտքից մոտավորապես 100 յարդ (մոտավորապես 91 մետր) հեռավորության վրա մեծ ու անշուք վրան տեղադրելու», - նշված է հաղորդագրության մեջ:
Պարահանդեսային սրահը կկառուցվի Սպիտակ տան արևելյան թևի հարևանությամբ, որը կառուցվել է 1902 թվականին: Պարահանդեսային սրահի մակերեսը, նախագծի համաձայն, կկազմի ավելի քան 8000 քառակուսի մետր և կկարողանա տեղավորել մինչև 650 մարդու. Սպիտակ տան Արևելյան սենյակն այժմ կարող է տեղավորել 200 մարդու։
Շինարարությունը կսկսվի այս տարվա սեպտեմբերին և, ինչպես ակնկալվում է, կավարտվի «նախագահ Թրամփի ժամկետի ավարտից շատ առաջ»։
Սպիտակ տանը նաև հավելել են, որ պարահանդեսային սրահի շինարարության միջոցները մտադիր են նվիրաբերել Թրամփն ինքը և մի քանի «հայրենասեր հովանավորներ», որոնց անունները չեն նշվում։