2 րոպեի ընթերցում
Մոսկվան կսպասի պաշտոնական վճիռներին այն դեպքում, եթե Ադրբեջանը միջազգային դատական ատյաններում հայց հարուցի Ռուսաստանի դեմ՝ Ակտաուի մերձակայքում տեղի ունեցած ինքնաթիռի կործանման պատճառով: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին ճեպազրույցի ժամանակ հայտարարել է Ռուսաստանի նախագահի մամուլի քարտուղար Դմիտրի Պեսկովը:
Ավելի վաղ լրատվամիջոցները հայտնել էին, որ Բաքուն փաստաթղթեր է պատրաստում միջազգային դատական ատյաններ ներկայացնելու համար՝ Ակտաուի մերձակայքում AZAL-ի ինքնաթիռի կործանման կապակցությամբ:
«Ընթանում են քննչական գործողություններ, ընթանում է հետաքննություն: Եթե Ադրբեջանը նման որոշում կայացնի, դա Ադրբեջանի իրավունքն է, մենք կսպասենք պաշտոնական վճիռներին», - ասել է նա:
Միևնույն ժամանակ Պեսկովը հայտարարել է, որ Մոսկվայի և Բաքվի հարաբերություններն ամուր հիմք ունեն, բայց այժմ բարդ շրջան են ապրում:
«Մենք հույս ունենք, որ այդ շրջանը կանցնի», - ընդգծել է նա՝ հավելելով, որ «երկու երկրների համագործակցությունը փոխադարձ օգուտ է բերում»:
Ինչպես նշել է Կրեմլի ներկայացուցիչը, Ռուսաստանի Դաշնությունում ադրբեջանական սփյուռքի ներկայացուցիչների ճնշող մեծամասնությունն օրինապահ քաղաքացիներ են: Միայն օրենքը խախտողներն են հետապնդման ենթարկվում:
«Ռուսաստանում ապրում է շատ մեծ ադրբեջանական սփյուռք, - մեկնաբանել է նա Մոսկվայի և Բաքվի միջև հարաբերություններում լարվածությունը: - Ըստ էության, ադրբեջանական սփյուռքի բոլոր ներկայացուցիչները մեր օրինապահ քաղաքացիներն են, որոնք այստեղ արժանի հարգանք են վայելում»:
Օրինապահ ադրբեջանցիները հարգանք են վայելում Ռուսաստանում, և Մոսկվան շատ կարևոր է համարում, որ ռուսներին հարգեն Ադրբեջանում, ընդգծել է Պեսկովը։
Նա հավելել է, որ «նրանք, ովքեր օրենքներ են խախտում, հետապնդվում են օրենքով»: