Ռոմանոս Պետրոսյանն անդրադարձել է էլէկտրաէներգիայի սակագնի հնարավոր փոփոխությունների մասին հարցին

«Հայաստանի էլեկտրական ցանցեր» ընկերության նորանշանակ ժամանակավոր կառավարիչ Ռոմանոս Պետրոսյանը հայտարարել է, որ չի կարող երաշխավորել, թե էլեկտրաէներգիայի սակագինը որ ուղղությամբ կգնա, միաժամանակ, սակայն, երաշխավորել է, որ սակագինը բխելու է բացառապես օբյեկտիվ, իրական ցուցանիշներից։  

«Արմենպրես»-ի հաղորդմամբ՝ այս մասին Պետրոսյանն ասել է լրագրողների հետ ճեպազրույցի ժամանակ՝ անդրադառնալով էլեկտրաէներգիայի հետագա սակագնի վերաբերյալ հարցին։  

Մեկնաբանելով ՀԷՑ-ի սեփականատեր Սամվել Կարապետյանի այն հայտարարությունը, որ 10 տարի էլեկտրաէներգիայի սակագինը չի թանկանալու՝ Պետրոսյանը զարմանք է արտահայտել, թե ինչպես կարելի է 10 տարվա կանխատեսում անել: 

«Ինչպե՞ս կարող է հարգարժան սեփականատերը 10 տարվա կանխատեսում անել, երբ չգիտենք՝ վաղը ինչ է տեղի ունենալու աշխարհում, տարածաշրջանում էներգետիկ համակարգում կամ էներգետիկ տեխնոլոգիաների զարգացման գործում։ Գուցե, երկու տարի հետո էներգետիկ ոլորտի այնպիսի գյուտ հայտնաբերվի աշխարհում, որ սակագները կիսով չափ  նվազեն»,-նշել է Ռոմանոս Պետրոսյանը։ 

Վերջինս նշել է, որ չի կարող երաշխավորել, թե սակագինը որ ուղղությամբ կգնա, բայց կարող է երաշխավորել, որ սակագինը բխելու է բացառապես օբյեկտիվ, իրական ցուցանիշներից, որոնք տեսանելի են լինելու ՀԷՑ-ի գործունեության մեջ, տնտեսվարման մեջ, այդ թվում՝ հարգելով տնտեսվարողի շահերը, եկամտաբերության ընդունելի չափերը՝ համաձայնեցված ոլորտը կարգավորող հանձնաժողովի հետ։  

«Բայց սակագնի հետ կապված բոլոր գործընթացներն անցնելու են օրենքի տառին համապատասխան: Որևէ մեքենայություն, զարտուղի հաշվարկներ, իրականության խեղում, կոռուպցիոն որոշում իմ լիազորությունների շրջանակում բացառում եմ և դրա համար հաշվետու եմ Հայաստանի Հանրապետության քաղաքացուն»,-ասել է Պետրոսյանը։ 

Խոսելով կառույցը նոր մասնագետներով համալրելու մասին՝ Ռոմանոս Պետրոսյանը նշել է, որ դրա մասին դեռ պետք է մտածել և որոշումներ կայացնել։