1 րոպեի ընթերցում
Ադրբեջանի ներկայացուցիչները չեն ներառվել հուլիսի 18-ին Մոսկվայում կայանալիք ԱՊՀ տնտեսական խորհրդի նիստի մասնակիցների ցուցակում։ «Արմենպրես»-ի փոխանցմամբ՝ այս մասին հաղորդում է ՏԱՍՍ-ի թղթակիցը։
Ցուցակում ներառված են մասնակիցներ Հայաստանից, Բելառուսից, Ղազախստանից, Ղրղզստանից, Ռուսաստանից, Տաջիկստանից, Թուրքմենստանից և Ուզբեկստանից։
Ավելի վաղ ադրբեջանական լրատվամիջոցները հայտնել էին, որ Ադրբեջանի պատվիրակությունը չի մասնակցում նիստին։
«Ավանդաբար ԱՊՀ միջոցառումներին հանրապետությունը ներկայացնում է փոխվարչապետ Յաղուբ Էյուբովը։ Սակայն նա չի մասնակցի ԱՊՀ տնտեսական խորհրդի նիստին։ Պատճառների թվում են Եկատերինբուրգում տեղի ունեցած իրադարձությունները և անցյալ տարվա վերջին AZAL ինքնաթիռի կործանումը», - գրել է Trend գործակալությունը՝ վկայակոչելով տեղեկացված աղբյուրի։
Հրատարակության աղբյուրի խոսքով՝ Բաքուն գոհ չէ այդ իրադարձություններին Մոսկվայի արձագանքից։
Ադրբեջանի նախարարների կաբինետի մամուլի ծառայությունը ՏԱՍՍ-ին հայտնել է, որ իրենք որևէ տեղեկություն չունեն երկրի փոխվարչապետի՝ նիստին մասնակցելու կամ չմասնակցելու մասին։