1 րոպեի ընթերցում
Ընթացքի մեջ են Ախուրյան բնակավայրը Արևիկ գյուղին կապող ներհամայնքային ավտոճանապարհի բարեկարգման աշխատանքները։ «Արմենպրես»-ի թղթակցի հաղորդմամբ՝ աշխատանքներն իրականացվում են շուրջ 2.4 կմ երկարությամբ ճանապարհահատվածում՝ հիմքից։ Ճանապարհի բարձրացման և հարթեցման աշխատանքներն իրականացվում են աղացած, մաքուր՝ առանց հողախառնուրդի ասֆալտանյութով, որն իր խտությամբ ֆիքսվում է ծանր տեխնիկայի կիրառմամբ։
Համայնքապետարանից տեղեկացրին, որ ասֆալտանյութը տրամադրել է Շիրակի մարզպետի աշխատակազմը, իսկ աշխատանքները կատարում է Ախուրյանի կոմունալ սպասարկում իրականացնող կազմակերպությունը։ Նույն նյութով հարթեցվել և բարեկարգվել է նաև Ախուրյանի գերեզմանատան որոշ հատված։
Միաժամանակ, ՀՀ տարածքային կառավարման և ենթակառուցվածքների նախարարության պատվերով մեկնարկել են Գյումրի–Արևիկ–Այգաբաց ճանապարհի հիմնանորոգման աշխատանքները: