Հուսով եմ՝ Երևանի ու Բաքվի միջև խաղաղության համաձայնագիրը կստորագրվի հնարավորինս շուտ․ Ուրսուլա ֆոն դեր Լայեն
2 րոպեի ընթերցում
Եվրոպական հանձնաժողովի նախագահ Ուրսուլա ֆոն դեր Լայենը Հայաստանի և Ադրբեջանի միջև խաղաղության համաձայնագրի շուտափույթ ստորագրման հույս է հայտնել։
«Արմենպրես»-ի հաղորդմամբ՝ այս մասին Եվրոպական հանձնաժողովի նախագահը նշել է Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Անտոնիու Կոշտայի հետ Բրյուսելում կայացած եռակողմ հանդիպման ընթացքում։
«Եվրոպական միության և Հայաստանի միջև հարաբերություններն ավելի սերտ են, քան երբևէ։ Մենք շատ հավակնոտ գործընկերային օրակարգ ունենք, մենք ունենք նաև Դիմացկունության և աճի ծրագիրը, որը 270 միլիոն եվրո է նախատեսում Հայաստան համար, և սա ցույց է տալիս Եվրոպայի հանձնառության խորությունը։ Մենք գիտենք, որ Ձեր գեղեցիկ երկիրը կարող է և կխաղա իր դերը Եվրոպայի ապագայում»,-շեշտել է Եվրոպական հանձնաժողովի նախագահը։
Հանդիպման ընթացքում Ուրսուլա Ֆոն դեր Լայենն անդրադարձ է կատարել նաև Հայաստանի ու Ադրբեջանի միջև խաղաղության բանակցություններին և խաղաղության համաձայնեցված փաստաթղթին՝ որակելով այդ համաձայնությունը որպես բացառիկ կարևորություն ունեցող պահ։
«Ադրբեջանի հետ խաղաղության պայմանագրի նախագծի շուրջ համաձայնությունը բացառիկ կարևորություն ունեցող պահ է․ այն ավարտին է հասցնում տասնամյակների ռազմական առճակատումը, և հուսով եմ, որ այն հնարավորինս շուտ կստորագրվի։ Վստահ եղեք, որ Եվրոպան կշարունակի օգնել ձեզ ձեր ճանապարհորդության ընթացքում»,-իր խոսքում նշել է Ուրսուլա ֆոն դեր Լայենը։