Հայաստանը կենտրոնացած է իր շուրջ խաղաղ միջավայր ստեղծելու վրա․ Արարատ Միրզոյանի հարցազրույցը՝ «ChinaDaily»-ին
3 րոպեի ընթերցում
Հայաստանը կենտրոնացած է իր շուրջ խաղաղ միջավայր ստեղծելու և իր տնտեսությունը միջազգային գործընկերների հետ զարգացնելու վրա՝ նպատակ ունենալով նպաստել հայ ժողովրդի բարգավաճմանը։
«Արմենպրես»-ի հաղորդմամբ՝ այս մասին հունիսի վերջին Պեկին կատարած այցի շրջանակներում Հայաստանի Հանրապետության արտաքին գործերի նախարար Արարատ Միրզոյանը նշել է չինական «ChinaDaily»-ին տված հարցազրույցում։
ՀՀ ԱԳ նախարարը նշել է, որ ժամանակակից բարդ միջազգային իրավիճակում պատասխանատու ազգերի համար կարևոր է պահպանել ընդհանուր կանոնները և աշխատել հակամարտությունների խաղաղ կարգավորման ուղղությամբ։
«Մենք կենտրոնացած ենք Հայաստանի շուրջ խաղաղ միջավայր ստեղծելու և մեր տնտեսությունը միջազգային գործընկերների հետ զարգացնելու վրա՝ մեր ժողովրդի բարգավաճմանը նպաստելու համար։
Ռազմավարական տեսլական հանդիսացող «Խաղաղության խաչմերուկ» նախաձեռնության նպատակն է Հայաստանը դիրքավորել որպես Ասիայի և Եվրոպայի միջև չեզոք և արդյունավետ տարանցիկ հանգույց։ Այն կարող է լրացնել ավելի լայն միջազգային շրջանակներն, այդ թվում՝ Չինաստանի կողմից առաջարկված «Մեկ գոտի, մեկ ճանապարհ» նախաձեռնությունը և նպաստել տարածաշրջանային տնտեսական ինտեգրմանը»,-ասել է Արարատ Միրզոյանը։
Միրզոյանը կարծիք է հայտնել, որ Հայաստանի շուրջ խաղաղության հաստատումը կարող է այն դարձնել միջազգային տարանցման կենսական միջանցք՝ Չինաստանից դեպի Եվրոպա և հակառակը։
Հայաստանի ԱԳ նախարարը նաև հայտարարել է, որ Երևանն ու Պեկինը բազմաթիվ հարցերի վերաբերյալ նմանատիպ տեսակետներ ունեն, իսկ Հայաստանն այն երկրներից է, որը մեծապես հույսը դնում է օրենքի և արդարության վրա հիմնված միջազգային կարգի վրա։
«Մենք ուզում ենք իմանալ կանոնները։ Մենք կհարգենք դրանք։ Բայց մենք նաև ակնկալում ենք, որ բոլորը հարգեն օրենքը»,-ասել է Միրզոյանը՝ հավելելով, որ կրկնակի ստանդարտները և խոշոր տերությունների կողմից միջազգային կանոնների ընտրովի մեկնաբանությունը փոքր երկրներին խոցելի դիրքում են դնում։
«ChinaDaily»-ին Արարատ Միրզոյանի հետ հարցազրույցի վերաբերյալ հոդվածում հիշեցրել է, որ Իսրայել-Իրան պատերազմի ընթացքում Հայաստանը օգնել է Չինաստանին Իրանից տարհանել իր քաղաքացիներին՝ մանրամասնելով, որ 800 չինացի Հայաստանի ցամաքային տարածքով հեռացել է Իրանից։