Լիբանանում իսրայելական հարվածներից 10 մարդ է վիրավորվել

Լիբանանի առողջապահության նախարարությունը հայտարարել է, որ Սուր շրջանում Իսրայելի ավիահարվածի հետևանքով վիրավորվել է ինը քաղաքացի: «Արմենպրես»-ի փոխանցմամբ՝ այս մասին հայտնում է Լիբանանի ազգային լրատվական գործակալությունը (NNA):

Բացի այդ, Սիդոն շրջանի Զրարիե գյուղաքաղաքի վրա Իսրայելի կողմից հասցված ավիահարվածի հետևանքով մեկ երեխա ծանր վիրավորվել է։

Al Mayadeen հեռուստաալիքի տեղեկացմամբ՝ հուլիսի 6-ի երեկոյան իսրայելական ռազմական օդանավերը ռմբակոծել են Բուդայ և Ֆլաուի ավանների ծայրամասային հատվածները, ինչպես նաև Լիբանանի հարավային մի քանի շրջաններ։

Իսրայելի բանակի մամուլի ծառայությունն իր հերթին հայտնել է, որ բանակը նոր հարվածներ է հասցրել Լիբանանում գտնվող շիա «Հեզբոլլահ»-ի թիրախներին։ Թիրախավորվել են «Հեզբոլլահ»-ի ռազմական օբյեկտները, այդ թվում՝ զենքի պահեստավորման և արտադրության օբյեկտներ, ինչպես նաև հրթիռների արձակման վայր։

Իսրայելական կողմի պնդմամբ՝ «զենքի և «Հեզբոլլահ»-ի առկայությունն այս տարածքում Իսրայելի և Լիբանանի միջև կնքված հրադադարի մասին պայմանավորվածությունների կոպիտ խախտում է»։

«Հեզբոլլահ»-ի գլխավոր քարտուղար Նայիմ Կասիմն իր ելույթում նշել է, որ շարժումը պատրաստ է խաղաղության և պետականաշինության, ինչպես նաև դիմակայության և պաշտպանության։ Սակայն նա մերժել է իր զենքերը, մասնավորապես՝ հրթիռները հանձնելու պահանջները՝ դրանք նկարագրելով որպես «իր պաշտպանական կարողությունների հիմք»։

Ըստ պաշտոնական տվյալների՝ Լիբանանի և Իսրայելի միջև նոյեմբերի 27-ին հրադադարի համաձայնագրի ուժի մեջ մտնելուց ի վեր Իսրայելը կատարել է մոտ 3000 խախտում, որի հետևանքով զոհվել է առնվազն 209 մարդ, վիրավորվել՝ 504-ը։

Հակառակ հրադադարի համաձայնագրին՝ իսրայելական բանակը մասամբ է դուրս եկել հարավային Լիբանանից՝ շարունակելով իր ենթակայության տակ պահել վերջին պատերազմի ժամանակ գրաված լիբանանյան հինգ կարևոր բլուրները։

2023 թ. հոկտեմբերից, Գազայի հատվածում ռազմական գործողություններին զուգահեռ, «Հեզբոլլահ»-ի և Իսրայելի միջև սկսվել էր սահմանային առճակատում, որը 2024 թվականի սեպտեմբերի 23-ին վերածվել էր լայնածավալ պատերազմի։ Պատերազմի հետևանքով Լիբանանում զոհվել էր ավելի քան 4000, վիրավորվել՝ մոտ 17 000 մարդ։ Բացի այդ, մոտ 1,4 միլիոն մարդ տեղահանության էր ենթարկվել։