Զախարովան ռուսաստանցիներին նախազգուշացրել է Ադրբեջան այցից առաջ հաշվի առնել ստեղծված իրադրությունը

Ռուսաստանը կոչ է անում Ադրբեջանին միջոցներ ձեռնարկել երկրների հարաբերությունները ռազմավարական դաշինքի մակարդակին վերադարձնելու համար: «Արմենպրես»-ի փոխանցմամբ՝ այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։

«Մենք, իհարկե, կոչ ենք անում ադրբեջանական կողմին միջոցներ ձեռնարկել միջպետական ​​հարաբերությունների այն մակարդակին վերադառնալու համար, որը ձևակերպված է պաշտոնական փաստաթղթերում։ Հիշեցնեմ, որ սա ռազմավարական դաշինքի մակարդակն է», - ասել է նա ճեպազրույցի ժամանակ, որի հեռարձակումն իրականացրել է ՌԴ ԱԳՆ-ն իր տարբեր սոցիալական հարթակներում։

Զախարովան հավելել է, որ երկու երկրների հարաբերություններում առաջացող խնդիրները պետք է լուծվեն գործընկերային եղանակով՝ քաղաքական և դիվանագիտական ​​ուղիներով։

Դիվանագետը նաև նշել է, որ Ադրբեջանն առայժմ չի թույլատրել ՌԴ հյուպատոսության աշխատակիցներին այցելել Բաքվում ձերբակալված Ռուսաստանի քաղաքացիներին՝ չնայած համապատասխան հարցմանը։ 

«Ցավոք, այս պահին Ռուսաստանի քաղաքացիներին, այդ թվում՝ ռուսական լրատվամիջոցների լրագրողներին այցելելու հնարավորությունը չի ապահովվել», - ասել է դիվանագետը։

Զախարովան նաև Ադրբեջանում գտնվող կամ այնտեղ այց պլանավորող ռուսաստանցիներին կոչ է արել հաշվի առնել այդ երկրում տիրող իրավիճակը։

«Նրանք, ովքեր մեզ հարցեր են տալիս այն մասին, թե արդյոք պետք է պլանավորեն իրենց ուղևորությունները, ինչ պետք է անեն, ինչպես պետք է գործեն՝ հաշվի առնելով այն, թե ինչ է ցուցադրվում, այդ թվում, ադրբեջանական հեռուստաալիքներով, և ինչ են հաղորդում այդ երկրի լրատվական գործակալությունները, իհարկե, եթե մեր քաղաքացիները գտնվում են Ադրբեջանում, եթե նրանք պլանավորում են ուղևորություն, ապա, իհարկե, նրանք պետք է ուշադիր դիտարկեն ստեղծված իրավիճակը։ Մենք ձեզ հետ կկիսվենք լրացուցիչ տեղեկատվությամբ», - ասել է նա։

Ռուսաստանի և Ադրբեջանի հարաբերությունները լարվել են Եկատերինբուրգում մի քանի ադրբեջանցիների ձերբակալությունից հետո, որի ընթացքում երկու մարդ էր մահացել։ Ադրբեջանն իր հերթին 4 ամսով կալանավորել է «Sputnik Ադրբեջան» գործակալության ղեկավարին և գլխավոր խմբագրին, ինչպես նաև ՌԴ 8 քաղաքացու՝ վերջիններիս մեղադրելով կազմակերպված հանցավոր կազմակերպությանը մասնակցության մեջ։