1 րոպեի ընթերցում
Թեհրանը դեռևս չի քննարկում Իրանի տարածքից երրորդ երկրներ ավելորդ միջուկային նյութերի հեռացման հարցը: «Արմենպրես»-ի փոխանցմամբ՝ այս մասին РИА Новости-ին հայտնել է Իրանի խորհրդարանի ազգային անվտանգության և արտաքին քաղաքականության հանձնաժողովի անդամ Ֆեդա Հոսեյն Մալեքին։
«Ինչ վերաբերում է ավելորդ միջուկային նյութերը երրորդ երկրներ ուղարկելուն, ապա պետք է ասել, որ այս հարցն առայժմ մեր օրակարգում չէ և ներառված չէ Իրանի քաղաքական ուղու մեջ, քանզի մեր ռազմավարությունը կայանում է նրանում, որ չշեղվենք երկրին անհրաժեշտ ուրանի հարստացման մակարդակից։ Դրա վերաբերյալ ամերիկացիների համապատասխան առաջարկները չենք ընդունել»,- նշել է նա:
Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ իր երկիրը պատրաստ կլինի անհրաժեշտության դեպքում աջակցել Իրանից ավելորդ միջուկային նյութերի հեռացմանը: