1 րոպեի ընթերցում
Ռուսաստանն ու Ուկրաինան «1000-ը 1000-ի դիմաց» ձևաչափով գերիների փոխանակման պայմանավորվածության շրջանակում մայիսի 23–ին 390–ական գերի են փոխանակել:
«Արմենպրես»-ի հաղորդմամբ՝ այս մասին հայտնել են կողմերը:
Ռուսաստանի պաշտպանության նախարարությունը տեղեկացրել է, որ վերադարձրել են 270 ռուս զինծառայողների և 120 քաղաքացիական անձանց: Ռուսաստանի ՊՆ–ից նշել են, որ ռուս զինծառայողներն ու քաղաքացիական անձինք այս պահին գտնվում են Բելառուսի տարածքում, որտեղ ստանում են անհրաժեշտ հոգեբանական և բժշկական օգնություն։ Նրանք բոլորը կտեղափոխվեն Ռուսաստան:
Իր հերթին Ուկրաինայի նախագահ Վոլոդիմիր Զելենսկին հայտնել է, որ վերադարձել են 390 գերիների: Նա նշել է՝ ակնկալում են, որ շաբաթ և կիրակի օրերին փոխանակումը կշարունակվի:
Ռուսական և ուկրաինական կողմերը «1000-ը 1000-ի դիմաց» ձևաչափով գերիների փոխանակման պայմանավորվածություն էին ձեռք բերել Թուրքիայում այս ամիս կայացած բանակցությունների արդյունքում: