Երևանում չորս ավտոմեքենաների բախման հետևանքով ծագած հրդեհը մարվել է. նախնական տվյալներով, տուժածներ չկան

Ճգնաժամային կառավարման ազգային կենտրոնը մայիսի 19-ի՝ ժամը 16:02-ին ահազանգ է ստացել, որ Երևան քաղաքի Սիլվա Կապուտիկյան փողոցում ավտոմեքենաներ են բախվել։ 

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել հրշեջ-փրկարարներ՝ 4 մարտական հաշվարկ։ 

Տեղում պարզվել է, որ այրվում է 4 տրանսպորտային միջոց, որոնցից 3-ը՝ մարդատար, իսկ 1-ը՝ բետոնախառնիչ։

Ըստ աղբյուրի՝ նախնական տվյալներով՝ տուժածներ չկան։

Հրդեհը մեկուսացվել է 16։50-ին, մարվել՝ 17։08-ին։

Նշվում է, որ ՀՀ ՆԳՆ փրկարար ծառայությունը կտարածի լրացուցիչ տեղեկատվություն։