2 րոպեի ընթերցում
Առնվազն 4 մարդ է զոհվել Պարսից ծոցի ափին գտնվող իրանական Շահիդ Ռաջայի նավահանգստում ապրիլի 26-ի կեսօրին տեղի ունեցած հզոր պայթյունի հետևանքով:
«Արմենպրես»-ի հաղորդմամբ՝ այս մասին հայտարարել է Իրանի փրկարար ծառայության ղեկավար Բաբակ Մահմուդին: Հայտարարվել է նաև 516 տուժածի մասին:
Նավահանգստի բեռների տերմինալի ղեկավար Փաժման Բեհզադպուրն ավելի վաղ իրանական Etemad Online գործակալությանը հայտնել էր, որ պայթյունը որևէ կապ չունի բեռների ընդունման տերմինալի և վտանգավոր նյութերի պահեստի հետ: Այդպիսով, նա հերքել էր նավահանգստի մաքսային վարչության հնչեցրած այն ենթադրությունը, որ պայթյունը, ամենայն հավանականությամբ, տեղի է ունեցել վտանգավոր և քիմիական նյութերի պահեստում:
Բենդեր Աբբաս քաղաքից 23 կմ արևմուտք գտնվող նավահանգստում հզոր պայթյունը որոտացել է ապրիլի 26-ի կեսօրին՝ վառելիքի բաքում բռնկված հրդեհի հետևանքով: Այն այնքան ուժեղ է եղել, որ զգացվել է կիզակետից առնվազն 20 կիլոմետր հեռավորության վրա՝ Պարսից ծոցի Քեշմ կղզում։ Մի քանի կիլոմետր շառավղով գտնվող կառույցներում վնասվել են պատուհանները: Փլուզվել է նավահանգստի շենքերից մեկը։
Հաղորդվում է նաև, որ դեպքի վայրում բռնկված հրդեհի մարմանը ներգրավվել են Արտակարգ իրավիճակների ծառայությունների ուղղաթիռները: Մոտակա քաղաքներից դեպքի վայր են ուղևորվել շտապօգնության 15 մեքենաներ և արտակարգ իրավիճակների 4 ավտոբուսներ։ Ջահրոմ և Լար քաղաքների արտակարգ ծառայությունները լիակատար պատրաստության վիճակում են։
Ներկայում ամբողջ նավահանգստի աշխատանքը դադարեցված է։