2 րոպեի ընթերցում
Հայաստանի ծանրամարտի հավաքականի անդամ Գարիկ Կարապետյանը դարձավ ԵԱ-ի կրկնակի չեմպիոն, Սիմոն Մարտիրոսյանը երկրորդն է:
«Արմենպրես»-ի հաղորդմամբ` Մոլդովայում ընթացող ծանրամարտի Եվրոպայի առաջնության 109 կգ քաշային կարգում Հայաստանն ուներ երկու ներկայացուցիչ` Սիմոն Մարտիրոսյանն ու Գարիկ Կարապետյանը:
Պոկում վարժությունում Սիմոն Մարտիրոսյանը բարձրացրեց 181 կգ և այստեղ դարձավ արծաթե մեդալակիր: Հրումում Մարտիրոսյանը բարձրացրեց 213 կգ, 225 կգ: Այստեղ ևս նա արժանացավ արծաթե մեդալի: Երկամարտի 406 կգ արդյունքով Մարտիրոսյանը երկրորդն էր ԵԱ-ում:
Գարիկ Կարապետյանը պոկում վարժությունում ժամանակ երկու հաջող մոտեցում ունեցավ` հաջորդաբար բարձրացնելով 180 կգ և 185 կգ: Այս վարժությունում Կարապետյանը նվաճեց փոքր ոսկե մեդալ: Հրում վարժությունում Կարապետյանը բարձրացրեց 212 կգ, 220կգ, 226 կգ: Նա կրկին առաջին տեղում էր: Երկամարտի 411 կգ արդյունքով` Կարապետյանը դարձավ Եվրոպայի կրկնակի չեմպիոն:
Մինչ այս Հայաստանի ծանրամարտի կանանց հավաքականի անդամներ Ալեքսանդրա Գրիգորյանը ու Աննա Ամրոյանը դարձել էին Եվրոպայի առաջնության արծաթե մեդալակիր: Տղամարդկանց պայքարում արծաթե մեդալ էին նվաճել Գոռ Սահակյանը, Ռաֆիկ Հարությունյանը, իսկ Գառնիկ Չոլակյանը ու Դավիթ Հովհաննիսյանը բրոնզե մեդալակիրներ են: