1 րոպեի ընթերցում
Ոռոգման սեզոնի ընթացքում ոռոջման ջրի տրամադրման գործընթացն անխափան իրականացնելու նպատակով մարտի առաջին տասնօրյակից Կառնուտի ջրամբարում Շիրակի մայր ջրանցքով կատարվել է ջրի կուտակման աշխատանքներ։ Ինչպես «Արմենպրես»-ին տեղեկացրեց Շիրակ մարզպետի աշխատակազմի գյուղատնտեսության և շրջակա միջավայրի պահպանության վարչության պետ Ռոման Համայակյանը, նախորդ տարվա նույն ժամանակահատվածի համեմատ Կառնուտի ջրամբարում այս տարի ավելի շատ կուտակված ջուր կա։
«Շիրակ» ՋՕԸ-ի կողմից իրականացվել են մայր ջրանցքում մաքրման աշխատանքներ, կուտակված աղբի տեղափոխում։
Անդրադառնալով գարնան գյուղատնտեսական աշխատանքների մեկնարկին, պատասխանատուն տեղեկացրեց, որ կատարվել է շուրջ 9808.7 հա աշնանացան ցորենի ցանք, որը ձմեռացման ընթացքում վնասներ չի կրել։
«Հաստատվել է «Բուսաբուծության աջակցության ծրագիրը», որը կնպաստի հացահատիկային, հատիկաընդեղեն մշակաբույսերի և կերային մշակաբույսերի ցանքատարածությունների ընդլայնմանը, մշակության արդյունավետության բարձրացմանը»,-նշեց Ռոման Համայակյանը՝ տեղեկացնելով, որ մարզի գյուղացիական տնտեսություններն օգտվել են պետական աջակցության 11 ծրագրից և ստացել են ծրագրերով նախատեսված փոխհատուցումները: