Վաշինգտոնը և Թեհրանը Օմանում անուղղակի բանակցություններ կանցկացնեն

Թեհրանը և Վաշինգտոնը շաբաթ օրը՝ ապրիլի 12-ին, Օմանում անուղղակի բանակցություններ կանցկացնեն։ «Արմենպրես»-ի փոխանցմամբ՝ այս մասին հայտարարել է Իրանի արտաքին գործերի նախարար Աբբաս Արաղչին։

«Իրանն ու ԱՄՆ-ն կհանդիպեն շաբաթ օրը Օմանում՝ բարձր մակարդակի անուղղակի բանակցություններ անցկացնելու համար։ Սա ինչպես հնարավորություն է, այնպես էլ ստուգում: Գնդակն ամերիկյան դաշտում է», - գրել է Արաղչին X սոցիալական ցանցում։

Ավելի վաղ Օմանում կայանալիք հանդիպման մասին հայտնել էր The New York Times հրատարակության լրագրող Ֆառնազ Ֆասիհին։

ԱՄՆ նախագահ Դոնալդ Թրամփն ապրիլի 7-ին հայտարարել է, որ Միացյալ Նահանգներն ու Իրանն «ուղիղ բանակցություններ» կանցկացնեն իրանական միջուկային խնդրի շուրջ։

«Մենք ուղիղ բանակցություններ ենք վարում Իրանի հետ», - Սպիտակ տանն ասել է նա լրագրողներին։ 

Այնուհետև նա պարզաբանել է, որ շփումները տեղի կունենան ապրիլի 12-ին՝ «գրեթե ամենաբարձր մակարդակով»:

«Հուսով եմ, որ այս բանակցություններն արդյունք կտան», - հավելել է ԱՄՆ նախագահը։

Թրամփի կարծիքով, Իրանի հետ նոր համաձայնագիրը «կտարբերվի» Թեհրանի և միջազգային միջնորդների «վեցյակի» միջև կնքված միջուկային համաձայնագրից (Գործողությունների համատեղ համապարփակ ծրագիր)։

«Հնարավոր է՝ մեր համաձայնագիրն ավելի հզոր լինի», - նշել է ԱՄՆ նախագահը։