Գյումրիում և Փարաքարում ՏԻՄ ընտրությունների ընթացքում ենթադրյալ իրավախախտումների վերաբերյալ 4 ահազանգ է ստացվել
2 րոպեի ընթերցում
Գյումրու և Փարաքարի ՏԻՄ ընտրությունների ընթացքում, մարտի 30-ի ժամը 16։00-ի դրությամբ, ՆԳՆ ոստիկանությունում ենթադրյալ իրավախախտումների վերաբերյալ ստացվել է 4 ահազանգ, որոնք ստուգման փուլում են։
«Արմենպրես»-ի հաղորդմամբ՝ այս մասին հայտնում են ՀՀ ներքին գործերի նախարարությունից՝ մանրամասնելով, որ քվեարկության գաղտնիությունը խախտելու՝ 1 և խուլիգանության ու ընտրական գործընթացի պատշաճ կազմակերպման համար անհրաժեշտ առարկաները հափշտակելու 1 դեպքով փաստաթղթերը փոխանցվել են նախաքննական մարմին։
Հաղորդագրության համաձայն՝ ստուգվում են նաև մամուլում և սոցիալական հարթակներում ընտրությունների վերաբերյալ հրապարակումները։ Արդյունքներով կտրվի լրացուցիչ տեղեկատվություն։
Ներկայացնելով Միգրացիայի և քաղաքացիության ծառայության կողմից կատարված աշխատանքները, ՆԳՆ-ից տեղեկացրել են, որ ընտրողների լրացուցիչ ցուցակներում ընդգրկվելու մասին դիմում ներկայացրել և տեղեկանք են ստացել 46 անձ, որոնցից 26 քաղաքացի Գյումրի համայնքում, 20-ը՝ Փարաքարում։ Ընտրություններին մասնակցելու համար ժամանակավորապես տրվող անձը հաստատող փաստաթուղթ (ձև 9) ստացել է 10 անձ, որոնցից՝ Գյումրի համայնքում՝ 6 քաղաքացի, Փարաքարում՝ 4:
ՆԳՆ շրջիկ ձևաչափով սպասարկման գրասենյակների աշխատակիցները 144 քաղաքացու տրամադրել են խորհրդատվություն, մասնավորապես՝ Գյումրիում՝ 111 անձի, իսկ Փարաքարում՝ 33:
ՆԳՆ թեժ գծին ընտրությունների վերաբերյալ հեռախոսազանգեր չեն ստացվել։
Գերատեսչության Միգրացիայի և քաղաքացիության ծառայությունում գործող «Զանգերի կենտրոնում» ընտրությունների կազմակերպման և անցկացման վերաբերյալ ստացվել է 2 զանգ։