2 րոպեի ընթերցում
Քաղաքացիական ավիացիայի միջազգային կազմակերպության (ICAO) կողմից իրականացված աուդիտի արդյունքում արձանագրված 41 թերությունները շտկվել են և կատարված աշխատանքների վերաբերյալ պաշտոնական հայտն արդեն ուղարկվել է Եվրամիություն։ «Արմենպրես»-ի հաղորդմամբ՝ տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի հերթական նիստում այս մասին ասաց ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը՝ ներկայացնելով Հայաստանի ավիացիոն ոլորտում միջազգային ստանդարտների ապահովման ուղղությամբ կատարված աշխատանքները։
«Քաղաքացիական ավիացիայի միջազգային կազմակերպության կողմից իրականացվել է Հայաստանում ավիացիոն ոլորտի միջազգային ստանդարտների և պահանջների համապատասխանության աուդիտ, որի շրջանակում ավիացիոն պատահարների քննության ոլորտում արձանագրված մի շարք թերությունների վերացման ուղղությամբ մշակվել էր միջոցառումների մի մեծ պլան։ Այս պահի դրությամբ 41 արձանագրված թերությունները շտկվել են և կատարված աշխատանքի մասին հայտն ուղարկվել է Եվրոպական Միություն։ Սպասում ենք գործընկերների արձագանքին»,- ասաց Ղալեչյանը։
Հայաստանի ավիացիան Եվրամիության «սև ցուցակում» է հայտնվել 2020 թվականի հունիսից, ինչի հետևանքով արգելվել է հայկական ավիափոխադրողների մուտքը ԵՄ օդային տարածք։ Այս սահմանափակումը վերացնելու ուղղությամբ Հայաստանի իշխանությունները տարիներ շարունակ աշխատել են՝ միջազգային ստանդարտներին համապատասխանելու նպատակով։
