3 րոպեի ընթերցում
Հայաստանի սփյուռքի գործերի գլխավոր հանձնակատարի գրասենյակի կողմից հաջողություն գրանցած «իԳործ» ծրագրին 2020 թվականից ի վեր մասնակցել է ավելի քան 250 սփյուռքահայ մասնագետ, որոնք հնարավորություն են ստացել աշխատել Հայաստանի պետական կառավարման համակարգում:
«Արմենպրես»-ի հետ զրույցում այս մասին ասաց Սփյուռքի գործերի գլխավոր հանձնակատարի գրասենյակի ծրագրերի իրականացման և մշտադիտարկման ծրագրերի բաժնի ղեկավար Աննա Մհերյանը՝ նշելով, որ այս տարվա «իԳործ» ծրագրին մասնակցելու համար դիմումներն արդեն ընդունվում են։
«Մեկնարկը տրվել է փետրվարի 27-ին, դիմումները կընդունվեն մինչև ապրիլի 4-ը, բայց հնարավոր է՝ դիմելու ժամկետը երկարաձգենք ևս 10 օրով:
Մասնագետների պահանջարկ ունեցող ոլորտները տարբեր են՝ սոցիոլոգիա և սոցիալական աշխատանք, ռազմական գիտություններ, մշակութաբանություն, հոգեբանություն, կրթություն, իրավագիտություն, տեղեկատվական տեխնոլոգիաներ, աղետների և ռիսկերի կառավարում, բնապահպանություն, գյուղատնտեսություն, զբոսաշրջություն և այլն։
Այս տարի մի փոքր փոխել ենք չափանիշները. ծրագրին կարող են մասնակցել բարձրագույն կրթությամբ և երեք տարի աշխատանքային փորձ ունեցող բոլոր սփյուռքահայ մասնագետները, որոնք ցանկություն են հայտնում մեկ տարի ժամկետով ժամանել Երևան և ֆիզիկապես իրենց ներկայությունը ապահովել պետական կառավարման համակարգում: Նշված չափանիշներին բավարարելու դեպքում նրանք կարող են անցնել աշխատանքի համապատասխան գերատեսչությունում»,- նշեց Աննա Մհերյանը:
Նա հավելեց՝ այժմ հայտերի ընդունման փուլն է, և այս ժամանակաշրջանի համար դրանք բավականին շատ են՝ 63 հայտ շուրջ 13 երկրից: Ըստ մասնագետի՝ հայտերի ընդունումից հետո հավաքագրվում են բոլոր կառույցների կարիքները և մասնակիցների ինքնակենսագրականներն ուղարկվում են համապատասխան կառույցներ՝ ըստ այդ կարիքների:
«2020 թվականից ի վեր ծրագրի շրջանակում ունեցել ենք շուրջ 250 մասնակից: Նշեմ, որ «Հովնանյան» և « Կերոն» հիմնադրամների հետ համագործակցելով՝ մեր մասնակիցները ևս մեկ տարի ժամկետով կարող են նույն պայմաններով շարունակել մնալ ծրագրում:
Ունենք նաև բավականին մեծ հայրենադարձություն, այս տարիների ընթացքում ծրագրի մասնակիցների գրեթե 73 տոկոսը հայրենադարձվել է»,- նշեց նա:
Աննա Մհերյանն ընդգծեց՝ «իԳործ» 2025-ը գործնականում կմեկնարկի սեպտեմբերի 1-ից, իսկ մինչև հունիսի վերջ կամ հուլիսի սկիզբ կիրականացվեն բոլոր հարցազրույցները. յուրաքանչյուր տարի իրականացվում է շուրջ 500 հարցազրույց:
Ծրագրի շրջանակներում ընտրված մասնակիցներն ապահովվում են երկկողմանի ավիատոմսով, մեկ տարվա առողջության ապահովագրությամբ, ինչպես նաև վճարվում է կացության կարգավիճակի գումարը: