Եվրամիությունն ուրախ է տեսնել Հայաստանի գրանցած մեծ առաջընթացը սպառողների պաշտպանության ոլորտում. Մարագոս

Եվրոպական միությունը շատ ուրախ է տեսնել սպառողների պաշտպանության ոլորտում Հայաստանի գրանցած առաջընթացը․ դա ցույց է տալիս Հայաստանի Հանրապետության նվիրվածությունը մարդու իրավունքներին: 

«Արմենպրես»-ի հաղորդմամբ՝ Սպառողների իրավունքների միջազգային օրվան նվիրված միջոցառման ժամանակ այս մասին ասաց Հայաստանում Եվրամիության դեսպան Վասիլիս Մարագոսը։

Նրա խոսքով՝ այս տարվա Սպառողների իրավունքների միջազգային օրվա թեման կենտրոնացած է արդար անցման, բայց նաև կայուն ապրելակերպի վրա, ինչը նշանակում է, որ սպառողների իրավունքները պետք է դիտարկվեն որպես ընդհանուր ջանքերի մի մաս, որն արվում է ավելի կայուն ապագա ունենալու, ավելի բարգավաճ լինելու համար:  

«Ուզում եմ շեշտել, թե որքանով է կարևոր այս աշխատանքը, որ դուք անում եք կառավարության ղեկավարությամբ, վարչապետի ղեկավարությամբ, ինչպես նաև մրցակցության պաշտպանության հանձնաժողովի հետ։ Դրա կարևորությունը կապված է ձեր ընդհանուր ջանքերի հետ՝ ամրապնդելու տնտեսության որակը, ամրապնդելու արտադրանքի որակը, ծառայությունների որակը: Հայաստանի և Եվրամիության միջև ստորագրված Համապարփակ և ընդլայնված գործընկերության համաձայնագրի շրջանակներում մենք ունենք բազմաթիվ պարտավորություններ, որոնք նաև կենտրոնացած են պաշտպանության վրա»,-նշեց Վասիլիս Մարագոսը:  

Նա ընդգծեց, որ ԵՄ օրենսդրության մեջ սպառողների պաշտպանության ոլորտում առանձնացվում են սպառողների պաշտպանության ազգային մարմինների միջև համագործակցությունը և փոխանակումը, սպառողների համար առցանց վեճերի լուծումը, ապակողմնորոշիչ գովազդի կարգավորումը, անարդար պայմանագրերը, գնագոյացումը, երաշխիքները և այլ բաղադրիչներ։ 

Մարագոսի դիտարկմամբ՝ սրանք բոլորը շատ կարևոր են թվային դարաշրջանում, որտեղ իրականում սպառողների պաշտպանության մեծ մասը պետք է անցնի թվային միջոցներով:  

«Հայաստանը մեծ առաջընթաց է գրանցում այս բոլոր ոլորտներում, բայց դեռ շատ աշխատանք կա անելու: Սա շատ օգուտներ է բերում ոչ միայն սպառողներին, այլ նաև ընկերություններին»,-ընդգծեց ԵՄ դեսպանը: 

Նրա կարծիքով՝ թվային դարաշրջանը սպառողների համար զգալի նոր օգուտներ է բերելու, քանի որ այժմ ավելի հեշտ է դառնում ծառայություններ և ապրանքներ գնելը, քան նախկինում, բայց մյուս կողմից պետք է պաշտպանել այդ սպառողներին, հատկապես, երբ խոսքը վերաբերում է միջսահմանային առևտրին: