Առաջիկայում նորություններ կլինեն. Արարատ Միրզոյանը՝ Հայաստան-ԱՄՆ ռազմավարական գործընկերության փաստաթղթի կյանքի կոչման մասին
2 րոպեի ընթերցում
Հայաստանը շարունակում է ակտիվ աշխատանքները Միացյալ Նահանգների նոր վարչակազմի, նախագահ Դոնալդ Թրամփի, նրա թիմի ներկայացուցիչների հետ:
«Արմենպրես»-ի հաղորդմամբ` այս մասին ասաց Հայաստանի արտաքին գործերի նախարար Արարատ Միրզոյանն ԱԺ արտաքին հարաբերությունների նիստում՝ ներկայացնելով կառավարության ծրագրի 2024 թվականի կատարման ընթացքի և արդյունքների մասին զեկույցը:
ԱԳ նախարարը հիշեցրեց տարեսկզբին Հայաստանի և ԱՄՆ-ի միջև ռազմավարական գործընկերության մասին փաստաթղթի ստորագրման մասին, որը նշանավորել է հարաբերությունների մակարդակի բարձրացումը:
Անդրադառնալով որոշակի մտահոգություններին, որ գործընկերությունը հաստատվել է ամերիկյան նախորդ վարչակազմի հետ և չի շարունակվելու նոր վարչակազմի հետ՝ Միրզոյանը վստահեցրեց, որ դա այդպես չէ, քանի որ նոր վարչակազմի ներկայացուցիչներն անցումային փուլում ընդգրկված են եղել աշխատանքներում:
«Եվ հիմա կարող եք փաստել, որ մեր ակտիվ աշխատանքները Միացյալ Նահանգների նոր վարչակազմի, նախագահ Թրամփի, նրա թիմի ներկայացուցիչների հետ շարունակվում են: Առաջիկայում ևս կլինեն որոշակի նորություններ՝ ի դեպ, նույն ռազմավարական համագործակցության փաստաթղթով նախատեսված որոշ դրույթների կյանքի կոչման ուղղությամբ»,-ասաց նա: