Եվրամիությունը կշարունակի պատասխան միջոցներ ձեռնարկել, եթե ԱՄՆ-ը բարձրացնի եվրոպական երկրներից ներմուծման մաքսատուրքերը
2 րոպեի ընթերցում
ԵՄ-ն կրկին կարձագանքի, եթե Միացյալ Նահանգները շարունակի նոր մաքսատուրքեր սահմանել Եվրամիությունից պողպատի և ալյումինի ներմուծման համար: «Արմենպրես»-ի հաղորդմամբ՝ այս մասին հայտարարել է Եվրահանձնաժողովի պաշտոնական ներկայացուցիչ Օլոֆ Ժիլը։
«Մենք դա արդեն արել ենք և շատ հստակ հայտարարել ենք, որ մաքսային այդպիսի գերսակագների սահմանման դեպքում կպատասխանենք նույնքան խստորեն, ինչպես արեցինք այսօր»,- նշել է նա Բրյուսելում մարտի 12-ին կայացած ճեպազրույցի ընթացքում:
Ժիլն ընդգծել է, որ այս պահին չի ցանկանում ենթադրություններ անել, սակայն կարող է ասել, որ ԵՄ-ն պատրաստվել է իրադարձությունների նման զարգացմանը:
«Այսօր ցույց տվեցինք, որ կարող ենք կոշտ և արագ, համաչափ արձագանքել՝ կիրառելով Առևտրի համաշխարհային կազմակերպության կանոնները: Հետագայում նույնպես այսպիսին կլինի մեր մոտեցումը նման միջոցներին, եթե դրանք կրկին անարդարացիորեն կիրառվեն մեր դեմ»,- հավելել է ԵՀ-ի պաշտոնական ներկայացուցիչը:
Մարտի 12-ին Եվրահանձնաժողովը հայտարարել է ԱՄՆ-ից ԵՄ ներմուծման համար 26 միլիարդ եվրոյի մաքսատուրք սահմանելու համար: Կազմակերպությունն այդ կերպ է արձագանքել ԵՄ-ից պողպատի և ալյումինի ներմուծման նկատմամբ ԱՄՆ-ի սահմանած նոր մաքսատուրքերին:
«Հանձնաժողովը ափսոսում է նման մաքսատուրքեր սահմանելու ԱՄՆ-ի որոշման համար՝ դրանք համարելով անհիմն, անդրատլանտյան առևտուրը խաթարող և վնասակար ձեռնարկությունների և սպառողների համար: Դա հաճախ հանգեցնում է գների բարձրացման»,- նշվում է ԵՀ-ի հայտարարությունում: