ՀՀ-ն փորձում է վարել բալանսավորված քաղաքականություն տարածաշրջանի երկրների և ուժային կենտրոնների հետ. ԱԺ նախագահ
2 րոպեի ընթերցում
Հայաստանը փորձում է վարել բալանսավորված քաղաքականություն տարածաշրջանի երկրների և ուժային կենտրոնների հետ, որի հիմքում անվտանգության, տնտեսության, էներգետիկ և այլ ոլորտների դիվերսիֆիկացիան է:
«Արմենպրես»-ի հաղորդմամբ՝ այս մասին ընդգծեց Ազգային ժողովի նախագահ Ալեն Սիմոնյանը Հայաստանի խորհրդարանում անցկացվող ԵՄ-Հայաստան խորհրդարանական գործընկերության կոմիտեի 4-րդ նիստի ընթացքում:
ԱԺ նախագահն ընդգծեց՝ գտնվելով քաղաքակրթությունների խաչմերուկում՝ Հայաստանը մեծապես կարևորում է հարևան պետությունների հետ բնականոն հարաբերությունները և ձգտում է տարածաշրջանում բաց սահմաններով ու գործընկերության վրա հիմնված հարաբերություններ հաստատել:
Ալեն Սիմոնյանն այս համատեքստում հիշեցրեց Հայաստանի կառավարության «Խաղաղության խաչմերուկ» նախագծի մասին։
«Մենք փորձում ենք վարել բալանսավորված քաղաքականություն տարածաշրջանի երկրների և ուժային կենտրոնների հետ, որի հիմքում անվտանգության, տնտեսության, էներգետիկ և այլ ոլորտների դիվերսիֆիկացիան է: Մենք ամենատարբեր ոլորտներում ընդլայնում ենք համագործակցությունը նաև ԵՄ անդամ երկրների հետ»,-ասաց նա:
Սիմոնյանը շեշտեց, որ Հայաստանը նոր էջ է բացել իր պատմության մեջ: Հայաստանն ընտրել է ժողովրդավարական ուղով զարգանալու ճանապարհը, քանի որ կանգնած է եվրոպական քաղաքակրթության արժեհամակարգի ակունքներում և հաստատակամ շարունակում է ամրապնդել ժողովրդավարությունն ու իր ուժերով իր երկիրը պաշտպանելու ու հզորացնելու քաղաքականությունը:
«Մենք գիտակցում ենք, որ սա շատ դժվար և վտանգներով լի ճանապարհ է: Աշխարհում տիրող իրավիճակը, արագ փոփոխվող իրականությունը մեզ ստիպում են լինել լայնախոհ և կայացնել ճիշտ որոշումներ, որքան էլ դրանք դժվար լինեն»,-ասաց ԱԺ նախագահը: