Գեղարքունիքում ձյան բարձրությունը հասնում է մինչև 50 սմ-ի, իրականացվում են ճանապարհների մաքրման և մշակման աշխատանքներ
2 րոպեի ընթերցում
Փետրվարի 21-ի ողջ գիշերը և առավոտյան ժամերին Գեղարքունիքի մարզում առատ ձյան տեղումները շարունակվում են, ժամը 11-ի դրությամբ Գավառում և Ճամբարակում ձյան շերտը կազմում է մինչև 50, Սևանում և Մարտունիում՝ մինչև 30, իսկ Վարդենիսում՝ մինչև 20 սանտիմետր։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, փետրվարի 20-ի երեկոյան ժամերին, փետրվարի 21-ի գիշերային ժամերին և առավոտյան ճանապարհները սպասարկող կազմակերպությունների կողմից իրականացվել ու շարունակվում են իրականացվել ավտոճանապարհների մաքրման և մշակման աշխատանքներ, ինչի արդյունքում մարզում փակ ավտոճանապարհներ չկան։
Սակայն բարձրլեռնային որոշակի հատվածներ քամու և բքի պատճառով դժվարանցանելի են։
Ճանապարհները սպասարկող կազմակերպություններն աշխատում են շուրջօրյա ռեժիմով։
Գեղարքունիքի մարզպետի հանձնարարությամբ, անհրաժեշտությունից ելնելով, մարզի համայնքապետարանների տեխնիկական միջոցներրը նույնպես ներգրավված են մարզի ավտոճանապարհների մաքրման աշխատանքներում։
Վարդենյաց լեռնանցքը փակ է կցորդով տրանսպորտային միջոցների համար, իսկ մյուս տրանսպորտային միջոցների համար՝ դժվարանցանելի։
Գեղարքունիքի մարզով անցնող միջպետական, հանրապետական, ինչպես նաև մարզային և համայնքային նշանակության ավտոճանապարհները հիմնականում բաց են և երթևեկելի։