ՄԱԿ-ի գլխավոր քարտուղարը Գազայի հատվածում հրադադարի կոչ է արել՝ մերժելով «էթնիկ զտումները»

ՄԱԿ-ի գլխավոր քարտուղար Անտոնիու Գուտերեշը Պաղեստինի ժողովրդի անօտարելի իրավունքների իրացման հարցերով ՄԱԿ-ի կոմիտեի վերջին նիստի բացմանը միջազգային հանրությանը կոչ է արել շարունակել հրադադարի ռեժիմի պահպանման  և Գազայում պահվող բոլոր պատանդների ազատ արձակման ուղղությամբ ջանքերը, ինչպես նաև «խուսափել ցանկացած տեսակի էթնիկ զտումներից»: «Արմենպրես»-ի փոխանցմամբ՝ այս մասին հայտնում է ՄԱԿ-ի պաշտոնական կայքը։

«Պաղեստինի ժողովրդի անօտարելի իրավունքների իրացումն, ըստ էության, վերաբերում է պաղեստինցիների՝ իրենց սեփական հողում պարզապես որպես մարդ ապրելու իրավունքին»,- հայտարարել է ՄԱԿ-ի գլխավոր քարտուղարը՝ զգուշացնելով, որ այդ իրավունքների իրացումն անհասանելի է դառնում:

Գուտերեշն ընդգծել է միջազգային իրավունքին համապատասխանելու և էթնիկ զտումների ցանկացած ձևից խուսափելու անհրաժեշտությունը՝ շեշտելով երկու պետությունների՝ Իսրայելի և Պաղեստինի միջև խնդիրների լուծման սկզբունքը։

Նա միևնույն ժամանակ ընդգծել է, որ ոչինչ չի արդարացնում 2023 թ. հոկտեմբերի 7-ին պաղեստինյան ՀԱՄԱՍ արմատական շարժման սարսափելի հարձակումները կամ այն, ինչ տեղի է ունեցել Գազայում վերջին ամիսների ընթացքում: Նա մատնանշել է ավերածությունների ահռելի չափերը, տասնյակ հազարավոր զոհերը, ենթակառուցվածքների ոչնչացումը, սովը և հիվանդությունների տարածումը։

Գուտերեշը կոչ է արել անդամ պետություններին, դոնորներին և միջազգային հանրությանը ֆինանսավորել հումանիտար գործողությունները և բավարարել հրատապ կարիքները և կրկին հորդորել է աջակցել Պաղեստինի փախստականներին աջակցող ՄԱԿ-ի գործակալության (UNRWA) աշխատանքին: