2 րոպեի ընթերցում
Հայաստանը նվիրված և հետամուտ է լինելու խաղաղության օրակարգին։
«Արմենպրես»-ի հաղորդմամբ՝ Վրաստանի ԱԳ նախարար Մակա Բոճորիշվիլիի հետ համատեղ ասուլիսի ժամանակ այս մասին ասաց Հայաստանի արտաքին գործերի նախարար Արարատ Միրզոյանը։
Նախարարը նշեց, որ Հայաստանն արդեն ներկայացրել է առաջարկներ տրանսպորտային ենթակառուցվածքների ապաշրջափակման վերաբերյալ՝ Ադրբեջանի հետ հարաբերությունների կարգավորման համատեքստում։
«Բոլորդ տեղյակ եք Հայաստանի «Խաղաղության խաչմերուկ» նախաձեռնությունից, որը ենթադրում է ակտիվ տնտեսական, տրանսպորտային համագործակցություն ոչ միայն Հարավային Կովկասի երեք երկրների միջև, նաև ավելի մեծ տարածաշրջանում և այլ երկրների մասնակցությամբ ևս։ Նաև այս նախաձեռնության շրջանակներում մենք արել ենք մի առաջարկ տրանսպորտային ենթակառուցվածքների ապաշրջափակման վերաբերյալ Ադրբեջանի հետ մեր հարաբերությունների կարգավորման գործընթացի շրջանակներում։
Իհարկե, պատրաստ ենք նաև այս ծրագրով և մյուս ուղղություններով վերջնականացնել Ադրբեջանի հետ հարաբերությունների կարգավորման գործընթացը։ Մեր կառավարության դիրքորոշումը նույնն է՝ մենք նվիրված ենք և հետամուտ ենք լինելու խաղաղության օրակարգին։ Դա վերաբերվում է թե՛ խաղաղության պայմանագրին, թե՛ տրանսպորտային ենթակառուցվածքների ապաշրջափակմանը, թե՛ սահմանազատմանը»,- ընդգծեց Միրզոյանը։