Վաշինգտոնում մեկնարկել է ԱՄՆ նախագահ Դոնալդ Թրամփի երդմնակալության արարողությունը

Վաշինգտոնում մեկնարկել է ԱՄՆ նախագահ Դոնալդ Թրամփի և փոխնախագահ Ջեյմս Դեյվիդ Վենսի երդմնակալության արարողությունը։

«Արմենպրես»-ի հաղորդմամբ՝ Վաշինգտոնում սպասվող մինուս 11 աստիճան ցրտի պատճառով Թրամփը  և Դեյվիդ Վենսը երդում են տալիս ոչ թե Կոնգրեսի շենքի առջև, ինչպես նախապես ծրագրված էր, այլ Ռոտոնդայում՝ կենտրոնական դահլիճում, որը մոտ հազար հոգու կարող է հյուրընկալել։

Երդմնակալության արարողությանը ներկա են ԱՄՆ 46-րդ նախագահ Ջո Բայդենը, ԱՄՆ 44-րդ նախագահ Բարաք Օբաման, 43-րդ նախագահ Ջորջ Բուշը և նրա կինը՝ Լորան, ԱՄՆ 42-րդ նախագահ Բիլ Քլինթոնը, Թրամփի հիմնական մրցակից Քամալա Հարիսը, այլ բարձրաստիճան պաշտոնյաներ, միջազգային պատվիրակություններ և հազարավոր ամերիկացիներ։ Միջոցառումը ուղեկցվում է տոնական միջոցառումներով և համերգներով։ Հյուրերի շարքում են SpaceX-ի և Tesla-ի հիմնադիր Իլոն Մասկը, Meta-ի հիմնադիր Մարկ Ցուկերբերգը և նրա կինը՝ Պրիսցիլա Չանը, Amazon-ի հիմնադիր Ջեֆ Բեզոսը և նրա կինը՝ Լորեն Սանչեսը, ԱՄՆ նախկին փոխնախագահ Մայք Փենսը, ինչպես նաև այլ բարձրաստիճան հյուրեր։