Քաղշինկոմիտեի ղեկավարը ներկայացրեց 300 դպրոցների կառուցման ու հիմնանորոգման աշխատանքների ցուցանիշները
1 րոպեի ընթերցում
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ։ Հանրապետությունում 300 դպրոցի կառուցման, վերակառուցման, հիմնանորոգման ծրագրով արդեն իսկ իրականացվել է 315 դպրոցի տեղորոշում, որից 46-ի շինաշխատանքները կամ ավարտված են, կամ նախատեսվում են առաջիկա օրերին։
«Արմենպրես»-ի հաղորդմամբ՝այս մասին հունվարի 13-ի ասուլիսին տեղեկացրեց ՀՀ քաղաքաշինության կոմիտեի նախագահ Եղիազար Վարդանյանը։
«Ընթացքում են 27 դպրոցի շինաշխատանքները, իսկ 142-ի մասով կնքված են պայմանագրեր, որից 15-ը՝ վերանորոգման վերաբերյալ»,-ասաց Վարդանյանը՝ հավելելով, որ նախապատրաստական փուլում են գտնվում 100 դպրոց, որոնց աշխատանքները կմեկնարկեն առաջիկայում, այդ թվում՝ 40-ի մասով արդեն գնման գործընթաց է իրականացվում։