1 րոպեի ընթերցում
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ: Հայաստանը ներկայացնող մարզիկները միջազգային մրցաշարերում 2024 թվականին, ընդհանուր առմամբ, 384 մեդալ են նվաճել:
«Արմենպրես»-ի հաղորդմամբ` այս մասին լրագրողների հետ ամփոփիչ հանդիպման ժամանակ ասաց ՀՀ ԿԳՄՍ նախարար Ժաննա Անդրեասյանը:
«Անցած տարին Օլիմպիական խաղերի տարի էր, որտեղ արդյունքներն այնպիսին չէին, ինչպիսին կուզենայինք, որ լինեին: Բայց ունեցանք 4 մեդալ և մարզիկներն արեցին առավելագույնը` լավագույն արդյունքի հասնելու համար: Անցած տարի մեր մարզիկներն, ընդհանուր առմամբ, նվաճել են 384 մեդալ: Հատկապես կարևորում եմ այն, որ ոսկե մեդալների թիվն ավելացել է 32 տոկոսով` նախորդ տարվա 28 տոկոսի համեմատ»,-ասաց նախարարը:
Անդրեասյանն առանձնացրեց այն փաստը, որ 2024 թվականին Հայաստան եկած մեդալներից 50-ը նվաճել են կանայք:
«Մենք լուրջ ենք նախապատրասվում 2027 թվականին Հայաստանի Հանրապետությունում կայանալիք Ֆրանկոֆոն խաղերին, քանի որ ավելի քան 50 երկրից 4000 մասնակից ենք ակնկալում»,-ասաց Անդրեասյանը:
Վերջինս խոսեց նաև մասսայական սպորտին ուղղված նախարարության ջանքերի մասին` ընդգծելով ՀՀ «Վարչապետի գավաթի» 5 խոշոր մրցաշարերը, որոնց մասնակցել է 9600-ից ավելի մասնակից: