1 րոպեի ընթերցում
ԳՅՈՒՄՐԻ, 16 ԴԵԿՏԵՄԲԵՐԻ, ԱՐՄԵՆՊՐԵՍ: Գյումրիի գլխավոր տոնածառի լույսերը կվառվեն դեկտեմբերի 22-ին: «Արմենպրես»-ի փոխանցմամբ՝ այս մասին իր Ֆեյսբուքի էջում գրել է Գյումրիի քաղաքապետի ժամանակավոր պաշտոնակատար Սարիկ Մինասյանը:
Տոնածառի գնման և զարդարման աշխատանքները երկար ժամանակ չէին կարող իրականացվել, քանի որ մրցույթ հայտարարել հնարավոր չէր՝ «Բալասանյան դաշինքի» մանդատների հանձման և համայնքապետի հրաժարականից հետո։
Շիրակի մարզպետի աշխատակազմը ստանձնեց տոնածառի գնման, տեղադրման և զարդարման աշխատանքները՝ ՀՀ տարածքային կառավարման և ենթակառուցվածքների նախարար Դավիթ Խուդաթյանի հանձնարարականով: Այդ նպատակով ՀՀ կառավարության որոշմամբ Շիրակի մարզպետի աշխատակազմին հատկացվեց 20 մլն 100 հազար դրամ։
Տոնածառը ձեռք է բերվել «Արեգակ գրուպ» ՍՊԸ-ից՝ 11 մլն 909 հազար դրամով։ Այն արհեստական է և նախատեսված է բազմակի օգտագործման համար, բարձրությունը՝ 15 մետր։
Ամանորյա դեկորների նորերով փոխարինման և վերանորոգման ծառայությունների համար պայմանագիր է կնքվել «Գյումրիի վերելակային տնտեսություն» ԲԲ ընկերության հետ, որի պայմանագրային արժեքը կազմել է 4 մլն 50 հազար դրամ։