Հարկադիր կատարումն ապահովող ծառայությունում կսահմանվեն պարգևատրման հավելյալ ֆոնդի նոր կարգավորումներ

ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանի կառավարության «e-draft» իրավական ակտերի կայքում հրապարակվել է նախագիծ, որով առաջարկվում է սահմանել Հարկադիր կատարումն ապահովող ծառայության պարգևատրման հավելյալ ֆոնդի ձևավորման, հաշվարկման և հատկացվող գումարի առավելագույն չափի որոշման նոր կարգավորումներ։ «Արմենպրես»-ի հաղորդմամբ՝ նախագիծը նպատակ ունի խրախուսել հարկադիր կատարողներին առավել արդյունավետ գործունեության համար՝ ամրագրելով արդյունքահեն պարգևատրման մեխանիզմ։ Նախատեսվում է պարգևատրման հավելյալ ֆոնդի տրամադրման համար հիմք ընդունել կարճված կատարողական վարույթների և ընթացք տրված նոր վարույթների տոկոսային հարաբերակցությունը։ Արդյունքում սպասվում է, որ համակարգը կդառնա առավել արդյունավետ, և կխթանվի կատարողականի դրական աճը։

Պարգևատրման ֆոնդը կձևավորվի հաշվետու ժամանակահատվածում գանձված կատարողական ծախսի հիման վրա։ Հաշվետու ժամանակահատվածը կդիտարկվի որպես ընթացիկ տարվա առաջին կիսամյակ և նախորդ տարվա երկրորդ կիսամյակ։

Ֆոնդի ձևավորման համար սահմանվել են հաշվարկային որոշակի տոկոսներ, որոնք կփոփոխվեն յուրաքանչյուր տարի՝ խթանելով ավելի արդյունավետ աշխատանք։

Նախագծի ընդունումը չի պահանջի լրացուցիչ բյուջետային ծախսեր և նախատեսվում է համահունչ ՀՀ կառավարության 2021-2026թթ. ծրագրի և դատական ու իրավական բարեփոխումների ռազմավարությանը։

Նախագիծը մշակվել է ՀՀ արդարադատության նախարարության կողմից՝ ՀՀ ֆինանսների նախարարության հետ համատեղ քննարկումների արդյունքում։ Սպասվում է, որ նոր կարգավորումները ուժի մեջ կմտնեն 2025 թվականի հունվարի 1-ից։

Նախագծի ընդունմամբ պարգևատրման հավելյալ ֆոնդի միջոցով Հարկադիր կատարումն ապահովող ծառայությանում կստեղծվի արդյունավետության վրա հիմնված խրախուսման համակարգ՝ նպաստելով ավելի լավ արդյունքների և համակարգային բարեփոխումների իրականացմանը։