2 րոպեի ընթերցում
ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: «Բերդ» պարային անսամբլը համերգային շրջագայությամբ Ֆրանսիայում է: «Արմենպրես»-ի փոխանցմամբ՝ անսամբլի ելույթները մի առանձնակի ջերմությամբ ու ոգևորությամբ են ընդունվում հանդիսատեսի կողմից՝ հայկական մշակույթի տարածման ու հանրահռչակման յուրահատուկ գործոն դառնալով: Այսպիսով, համույթն ուղղակիորեն դառնում է հայկական մշակույթի դեսպանը:
Այս շրջագայությունը, լինելով համաշխարհային մշակութային իրադարձություն, աշխարհի ժողովուրդներին ի ցույց է դնում հայոց հնամյա մշակույթի նորօրյա փայլն ու գեղեցկությունը՝ հայկական պարերի չխամրող շքեղությամբ:
Հատկանշական է, որ «Բերդ»-ի կատարումները ժամանակի շարժման ուժն ու արագությունը վերածում են պատմական հիշողության անմոռանալի ակնթարթների, հուզական ու վառ տպավորությունների, որոնց շնորհիվ հայկական պարերի գևորգյանական բեմադրությունները դառնում են համընդհանուր տոնակատարություն՝ եվրոպական ժողովուրդներին ի ցույց դնելով ժամանակակից պարարվեստ՝ ազգային ավանդական շարժումների հիմքի վրա կառուցված, գույներով և երաժշտությամբ հագեցած:
Համույթն այս պահին մենահամերգներով հանդես է գալիս Ֆրանսիայի տասնյակ քաղաքներում՝ ցուցադրելով հայկական պարարվեստի վեհությունն ու գեղեցկությունը:
