2 րոպեի ընթերցում
ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Հունգարիայի մայրաքաղաք Բուդապեշտում կայացած «Եվրոպայի քաղաքական համայնքի գագաթնաժողովի» գլխավոր նիստից վերադառնալիս` ինքնաթիռում լրագրողների հետ ունեցած զրույցի ընթացքում Թուրքիայի նախագ Ռեջեփ Թայիփ Էրդողանը անդրադարձել է նաև Թուրքիա-ԵՄ հարաբերություններին:
«Արմենպրես»-ի փոխանցմամբ՝ այդ մասին հայտնել են թուրքական լրատվամիջոցները։
«Մենք հավատարիմ ենք ԵՄ-ին լիիրավ անդամակցության մեր նպատակին և այս ուղղությամբ քայլեր ենք ձեռնարկել ու շարունակում ենք ձեռնարկել։ Մենք հանդես ենք գալիս Եվրամիության հետ առանց քաղաքական խոչընդոտների, հավասար և անկեղծ հարաբերությունների օգտին: Մենք ԵՄ-ից ակնկալում ենք հեռանկարային մոտեցում: Լավ սկիզբ կլիներ ԵՄ-ի մաքսային միության թարմացումը և վիզային ռեժիմի ազատականացմանն ուղղված քայլերի ձեռնարկումը։ Մեզ տված խոստումների կատարումը ԵՄ-ի համար հնարավորություն է՝ դրսևորելու իր անկեղծությունը, քանի որ մենք արդեն կատարել ենք մեր տված բոլոր խոստումները»,- նշել է Էրդողանը։
Նա նաև հիշեցրել է Եվրոպական հանձնաժողովի նախագահ Ուրսուլա ֆոն դեր Լայենի վերջին հայտարարությունները՝ ի աջակցություն Թուրքիայի հետ երկխոսության ակտիվացման:
«Նրա կողմից նախկինում նման վերաբերմունք չենք տեսել: Մենք ընդլայնելու ենք շփումները ԵՄ գործընկերների հետ։ Մենք կշարունակենք քննարկել այս հարցը ղեկավարների հետ մեր հանդիպումներում և հուսալ, որ բարենպաստ արդյունք կունենանք»: