ՄԿՈՒ հաստատությունների մասնագետները ևս կարող են օգտվել աշխատավարձի բարձրացման հնարավորությունից՝ մասնակցելով կամավոր ատեստավորմանը

ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ։ Հանրապետության միջին մասնագիտական ուսումնական հաստատությունների մասնագետները ևս հնարավորություն կունենան կամավոր ատեստավորում անցնել։ Արդյունքում կարող են օգտվել աշխատավարձի բարձրացման հնարավորությունից։ 

«Արմենպրես»-ի մամուլի սրահում հրավիրված ասուլիսում Հայաստանի կրթության, գիտության, մշակույթի և սպորտի նախարարի տեղակալ Արաքսիա Սվաջյանը նշեց, որ միջին մասնագիտական ուսումնական հաստատությունների համար գործելու է նույն համակարգն, ինչը նախատեսված է հանրակրթական դպրոցների համար։   

«Նոյեմբերի 30-ին պատրաստվում ենք նախնական ու միջին մասնագիտական ուսումնական հաստատությունների կամավոր ատեստավորման գործընթացին։ Այժմ իրականացվում են նախապատրաստական աշխատանքներ։ Ասեմ, որ 360-ից ավելի մասնագետ մասնակցելու է կամավոր ատեստավորմանը։ Գործընթացն իրականացվում է 4 ուղղությունով՝ գյուղատնտեսություն, տեղեկատվական տեխնոլոգիաներ, խոհարարություն և ոսկերչություն։ Հաջորդ տարի նոր ուղղություններ ևս կլինեն»,-ասաց Արաքսիա Սվաջյանը։

Նախարարի տեղակալը նշեց, որ փորձում են ատեստավորման համակարգը ներդնել տարբեր ոլորտներում, որպեսզի թե՛ աշխատողների կարողությունների զարգացման, թե՛ աշխատավարձերի բարձրացման հնարավորություն լինի։ Գործելու է նույն մեխանիզմն, ինչ հանրակրթական դպրոցներում՝ դրույքաչափի բարձրացում և հավելավճարներ։ Թեստերի առաջադրանքների 60 տոկոսը հաղթահարելու դեպքում դրույքաչափի փոփոխություն է տեղի ունենում։  Հաջորդիվ, արդյունքների համաձայն, համապատասխանաբար լինում է աշխատավարձի բարձրացում՝ 30, 40, 50 տոկոսի չափով։

Միջին մասնագիտական հաստատությունների մասնագետների համար ատեստավորման գործընթացը կազմակերպվելու է Երևանում, բայց կարող են մասնակցել այս ոլորտում աշխատող հանրապետության տարբեր մարզերի մասնագետները։