Եթե չկարողանանք միասին խնդիրը լուծել, ապա առհասարակ կհրաժարվենք այս ծրագրից. Ավինյանը՝ Արզումանյան 10 և 17 հասցեների շենքերի բնակիչներին
2 րոպեի ընթերցում
Երևան քաղաքի ավագանու 2-րդ նստաշրջանի 3-րդ նիստը
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Մայրաքաղաքի Արզումանյան փողոցի 10 և 17 հասցեներում գտնվող 4-րդ կարգի վթարային շենքերի փոխարեն նոր շենքեր կառուցելու գործընթացը քաղաքապետ Տիգրան Ավինյանը համարում է բարի կամքի դրսևորում է և երևանցիների անվտանգության խնդրի միակ լուծում:
«Արմենպրես»-ի հաղորդմամբ՝ այս մասին քաղաքապետ Տիգրան Ավինյանն ասաց Երևանի քաղաքապետարանի գործակարգավարական նիստի ժամանակ՝ ընդգծելով, որ եթե չկարողանան միասին, գրագետ ժամկետներում այս խնդիրը լուծել, ապա քաղաքապետարանը առհասարակ կհրաժարվի այս ծրագրից:
«Սա բարի կամքի դրսևորում է: Սա երևանցիների անվտանգության խնդրի լուծում եմ համարում, որտեղ քաղաքապետարանը, որպես այդպիսին, պարտավորություն չունի»,-նշեց Տիգրան Ավինյանը:
Նա ընդգծեց՝ շենքերը 4-րդ կարգի վթարային են, և ոչ ոք չգիտի, թե դրանք երբ կփլվեն: Քաղաքապետը հավելեց՝ բացի դա այդ բնակարանների արժեքը զրո է:
«Զրո արժեք ունեցող բնակարանների համար Երևանի քաղաքապետարանը նախագծել է ծրագիր, որով բնակիչներին միաժամանակ վարձի գումար է փոխհատուցվելու, որից հետո նույն տեղում կառուցված շենքում նույն բնակիչներին արդեն արժեքավոր բնակարաններ են տրամադրվելու: Այս ձգձգումները և դատական պրոցեսները կարող են բերել նրան, որ Երևանի քաղաքապետարանն առհասարակ հրաժարվի այս ծրագրից: Եթե չկարողանանք միասին, գրագետ ժամկետներում այս խնդիրը լուծել, ուղղակի այս խնդրից մենք կհրաժարվենք»,-ասաց Տիգրան Ավինյանը: