1 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Մարզային նշանակության պրենատալ սքրինինգի անվճար ծառայություն այսուհետև կգործի նաև Տավուշի մարզում:
Ինչպես «Արմենպրես»-ը տեղեկանում է ՀՀ առողջապահության նախարարությունից, անկախ ռիսկի գործոնների առկայությունից` մարզի բոլոր հղիների նախածննդյան հսկողության ընթացքում կիրականացվի հղիության սքրինինգ հետազոտություն, որը կընդգրկի բիոքիմիական սքրինինգ և էքսպերտային դասի ուլտրաձայնային հետազոտություն:
Առողջապահության գերատեսչությունից տեղեկացնում են, որ ծրագիրը կնպաստի պտղի զարգացման արատների, գենետիկական հիվանդությունների և միջամտության կարիք ունեցող այլ դեպքերի վաղ հայտնաբերմանը, ինչի արդյունքում հնարավոր կլինի մշակել հղիության անհատական վարման պլան, կանխատեսել ելքերը, անհրաժեշտության դեպքում՝ երեխայի ծնվելուց հետո իրականացնել բուժական միջոցառումներ:
Փորձարարական ծրագրի մեկնարկը տրվել է Շիրակի մարզից: